Minneapolis (Hubaal)- All-Magan Maxamuud Cabdullahi Ciise Sangub, oo ah wiil uu dhaley Abwaan Sangub ayaa habeen hore lagu diley magaalada Mineapolis ee dalka Mareykanka. Abwaanka oo ku sugan Muqdisho ayaa idaacadaha maxalliga ah u xaqiijiyay dhimashada wiilkiisa Allamagan oo 24 jir ahaa, hase ahaatee Sangub ma uusan bixin faahfaahin dheeraad ah oo ku saabsan dilka wiilkiisa. Booliska Minneapolis ayaa sheegay wiilkaas toogteen rag hubeysan, baadhitaana ay bilaabeen. Dilka wiilkan oo ka dhacay badhtamaha magaalada ayaa yimid kadib markii ay koox hubaysani rasaas ku furtay isagoo ka sii baxayey makhaayad ku taala Minneapolis, sida uu aabihii Warbaahinta u sheegay. 
Abwaanka ayaa sheegay in wax laga xumaado ay tahay dhalinyarada soomaaliyeed ee ku dhimanaysa dalka dibadiisa. Magaalada Minneapolis waxaa ku nool Soomaalida ugu badan ee ku nool dalka Mareykanka, dhowr jeer oo horena waxaa ka dhacay dilal noocaan oo kale ah oo loo gaystay dhallinyaro Soomaali ah iyo qaar kaleba.
