Laascaanood (Hubaal) Askari ka mid ahaa guutadda 9aad ee ciidanka qaranka oo fadhigeedu yahay deegaanka Gooja Cadde oo woqooyi ka kulaalaya Laascaanood, ayaa la sheegay inuu habeen hore toogasho ku dilay askari ciidanka ka tirsan, mid kalena dhaawacay.
Siday sheegeen warar wargeyska Ogaal ka soo gaadhay Laascaanood, abaara 7:30 fiidnimo ee habeen hore, ayaa askari naanaystiisa lagu sheegay “Hal Dil” uu toogtay askari kale oo magaciisa lagu sheegay Cabdi Baaruud, isla markaana uu askarigaasi geeriyooday. Sidoo kalena uu dhaawacay askari kale oo magaciisa lagu sheegay Iid Caare, intaa kadibna uu askarigaasi la baxsaday gaadhi uu saaran yahay qori suug ahi.
Warku wuxuu intaa ku daray, in fadhiisimada ciidanku ka hawl galeen markiiba, isla markaana ay qabteen gaadhigii, balse uu baxsaday askarigii falkaa geystay. Warku wuxuu intaa raaciyay in gaadhigu ku dhacay bohol aagga xargaga oo dhacda koonfurta magaaladda Laascaanood, kadibna uu askariga la baxsaday ka booday, xilliga oo habeenimo ahaa darteedna aan lagu guulaysan in la qabto askarigaa, balse laga reebay gaadhiga tiknikada ah ee uu la baxsanayay.
Ma cadda meesha uu u socday, balse waxa loo malaynayaa inuu ku jihaysnaa dhinaca saaxdheer, marka loo eego jidka uu hayay, isla markaana ma cadda sababta uu dilka iyo dhaawaca ugu geystay askarta ee saaxiibadii ahaa.
Dhinaca kale ma jiro wax war ah oo dhinaca taliska ciidanka ka soo baxay oo xaqiijiyay falkaasi.
