Waxa Ay Xukuumadda Pyongyang Sheegtay In Cunsuriga Jamhuurigu Uu Ku Haboon Yahay Hoggaaminta Maraykanka Iyada Oo Ku Sifaysay Nin Caqli Badan
Pyongyang (Hubaal/ANN) Dawladda Waqooyiga Kuuriya oo faafisay borobagaando ay ku taageerayso murrashaxa jagada madaxweynenimo ee xisbiga Jamhuuriga ee Maraykanka Mr. Donald Trump, iyagoo sheegay inuu yahay ninka ugu wanaagsan ee hanan kara xilka madaxtinimo, isla markaana meesha ka saari kara cabsida dadka Maraykanka ka qabaan Nukliyeerka ay Waqooyiga Kuuriya samaysatay.
Bog Internet-ka ah oo ay aad wax ugu qoraan, uguna faafiyaan madaxda dawladda Waqooyiga Kuuriya, isla markaana Madaxdoodu adeegsadaan ayaa Donald Trump ku sheegay inuu yahay siyaasi caqli badan oo ku habboon in shacabka Maraykanku codkooda siiyaan si uu ugu guulaysto doorashada dalkaas ka qabsoomi doonta 8 November 2016.
Sidoo kale, waxa ay ku tilmaameen haweenayda la yidhaah Hillary Clinton ee ka dhex tartamaysa xisbiga Dimuqraadiga inay tahay qof fikir gaaban, iyagoo ku dhaleeceeyey aragtideeda ku aadan in la cunaqabateeyo dalalka nukliyeerka haysta ee Kuuriya ka mid tahay.
Siyaasiga cunsuriga ah ee Trump, ayaa sheegay inuu diyaarin doono wadahadal uu la yeesho hoggaamiyaha Waqooyiga Kuuriya Kim Jong Un si uu uga dhaadhiciyo inuu joojiyo barnaamijkiisa nukliyeerka, taasna uu kala kaashan doono Shiinaha oo xalinaya mashaakilaadka u dhexeeya dalalka Maraykanka iyo Waqooyiga Kuuriya.
