Wasiirku xigeenka wasaaradda Qorshaynta oo maalmihii u dambeeyay ku sugnaa gobolka Awdal iyo deegaanka Quljeed, isla markaana waday qorshe qaarkamid ah oday dhaqameedka deegaankaa Quljeed ay kalsoonidii kala noqonayaa suldaan Wabar ayaa galinkii dambe ee Jimcihii soo gabagabeeyay go’aankaasi. Odayaashaasi waxay sheegeen inay kalsoonidii kala noqdeen Suldaan Wabar isla markaana ay si buuxda u taageersan yihiin Somaliland.
Hadaba tan iyo markii ay odayaashaasi iyo wasiirku ku xigeenka wasaaradda qorshayntu ay shaaciyeen go’aamadooda waxa soo baxayay warar kale oo kasoo maaxayay garab kale oo diidan qaar kamid ah go’aamada odayaashaasi soo saareen. Saakay markii uu waagu baryay ayaa odayaashaasi mid ka mid ah oo lagu naanayso Balanbaalis xabsiga loo taxaabay, sidoo kale waxa saaka gurigiisa ciidan la duldhigay oday kale oo lagu magacaabo Ilyaas Jaamac Cali, hase ahaatee ciidanku way kasoo waayeen xilligaas gurigiisa oo waxa uu Ilyaas ku maqnaa suuqa sida ay noo xaqiijisay xaaska Ilyaas Jaamac. Sidoo kale waxay wararku sheegayaan in lagu dabo joogo oday kale oo lagu magacaabo Jibriil Aw-siciid oo isna kamid ah odayaasha diiddan go’aamada kasoo baxay garabka ku shiray Quljeed.
Inkastoo masuuliyiinta gobolka iyo kan dagmadu aanay ka hadal xadhiga caaqilkan, hadana markii ay warbaahinta GNA u kuurgashay xadhiggan ayaa waxay qaraabadiisu noo xaqiijiyeen in kaliya lagu haysto maxaad uga soo horjeesateen go’aamada shirkaasi,waxa kale oo dadka qaraabadu noo xaqiijiyeen in xadhigga caaqilkan uu soo amray wasiirku xigeenka wasaaradda Qorshaynta Xasan Dhinbiil oo isagu horay ugu hanjabay inuu xidhi doono qofka kasoo horjeesta go’aanka uu taageersan yahay ee ay odayaashaasi soo saareen.
“Arintani ayaa ah mid ugub ku ah guud ahaan gobolka Awdal tani waa siyaasadd cusub oo qaldan oo lagula dagaalamayo xorriyatul qawlka iyo madaxbaanida afkaarta bani’aadamka, waana arin ku cusub siyaasiyiinta kasoo jeeda gobolka Awdal oo sababi karta inay wiiqanto sumcadda siyaasigu” ayuu yiri nin magiciisa kusoo koobay Cali oo ku nool magaalada Borama, inkastoo dadka qaarkii u arkaan in arinta tahay mid sax ah.
Sida ay warbaahinta GNA u xaqiijiyeen dad xogogaal ah oo kasoo jeeda degmada Quljeed, go’aamada shirkaasi kasoo baxay ayaa ah mid kala qaybiyay bulshada iyo waxa garadka deegaanka Quljeed,halka dad aan khadka tilifoonka kula hadalnayna ku doodayaan in shirkaasi ahaa mid siyaasadaysan oo ay xukuumaddu dabada kariixayso maadaama wasiirku xigeenka wasaaradda qorshayntu muddooyinkanba arintaasi u joogay Quljeed.
Dhanka kale wararka aan ka helayno magaalada Borama ayaa sheegaya inuu socda shir hoose oo loogaga soo horjeedo go’aamada kasoo baxay shirkaas, islamarkaana lagu shaacinayo in bulshada reer Quljeed iyo waxgaradkeedu aanay isku raacsanayn qaar kamid ah qodobada laga soo saaray shirkii ka dhacay Quljeed.
source:gobanimonews
