Hargeysa (Hubaal) – Ururka qareennada somaaliland ee SOLLA oo shalay hadhimo sharafeed ku maamuusay Boqorka Beelaha Magaago, Boqor Maxamuud Cismaan Nuur, hadhimadaas oo ka qabsoontay Hotel-ka Dalxiis ee Magaalada Hargeysa.
Qadadan oo ay ku kulmeen garyaqaano badan oo ururka ka tirsan iyo Boqorka oo hor kacayay wefti cuqaal ah ayaa laysku weydaarsaday kaftan iyo haasaawe ku dhereran qiimaha ay madashan oo kale ku leedahay dhaqanka soo jireenka ah ee Bulshada. Waxaana xafladan oo jawigeeda iyo dareenkeeduba aad u sareeyay ay labada dhinac isku waydaarsadeen taariikh aad u facwayn oo ah tii Sheekh Isaxaaq markii uu yimi gayiga somaaliland oo xilligaas uu mandaqada oo dhan ka arriminayay Boqrka Magaadle, isla markaana uu sheekhu qoyka boqorka kula xididay inantiisii. Guurkaas oo ay ka tafiirmeen inta ugu badan ee beelaha sheekha ku abtirsada [Habar Magaadle]. Intii ay hadhimadu socotay waxa boqor Maxamuud Cismaan Nuur ka sheekeeyey sida ay u kala hor dhasheen tarantii sheekha ee magaadle iyo xabuusho oo uu tilmaamay in ay horeysay gabadha uu boqorka Magaadle dhalay ee sheekhu guursaday, isla markaana ay minyaro ahayd gabadha labaad ee sheekhu guursaday ee ay ka tafiirmeen beesha xabuusho. Waxa kale oo uu Boqorku ka warramay xaallada ay waqti xaadirkan ku sugan yihiin beesha waalidka u ah reer Sheekh Isaxaaq ee Magaadle. Waxaanu u soo jeediyey tarantii sheekha iyo dawlad ahaanba in hoos loo eego qoyskaas faca weyn xaaladooda iyo baahiyaha ay qabaan oo xuquuqdooda meel la iska dhigo, kuwaas oo aan hadda ka dhex muuqan xukuumadaha kala dembeeyey ee Somaliland. Waxaanu u soo jeediyey dawladda in laamaha kala duwan ee qaranka wax loogu daro, hadday tahay ciidammada, hay;adaha dawlada, iyo golayaasha kale ee qarankaba. “Caqliga fayoobi ma garawsan karo dad dhan oo halkii ay ka soo tafiirmeen ama abuurmeen ilaawa, waalidkoodna aan hoos u eegin” sidaa ayuu yidhi Boqor Maxamuud Cismaan Nuur, waxaanu intaa ku daray “Dulmiga diinteenu way innoo diiday, soomaaliduna waxa ay k umaahmaahdaa ‘ nin Abaal gala waa la arkaa, laakiin nin guda sida loo arkaa waa adag tahay”.
Geesta kale hoggaanka Ururka Qareennada Somaliland Ee SOLLA oo madashaasi ka hadlay ayaa bulshada Somaliland u soo jeediyey in waalidkooda ay hoos u eegaan “ ururka qareennadu waxa uu bulshada u soo jeedinayaa in sida ugu dhakhsaha badan beeshaa innoo waalidka ah ee abaalka dheeraadka ah innagu leh dad ahaan iyo dawlad ahaanba wixii ay innaga mudan yihiin loo qabto oo weliba saamigooda la siiyo” sidaa ayaa lagu yidhi qoraal xalay ka soo baxay xarunta ururka qareennada SOLLA oo soo gaadhay Wargeyska HUBAAL.
