Taleex(Hubaal)-Dagaal beelaysan oo ka bilaabmay deegaanka Taleex ayaa lagu guulaystay in la qaboojiyo. Dagaalkan oo laba beelood doraad galinkii dambe ku dhex maray degamdda Taleex ee gobolka Sool oo ay wadda daganyihiin ayaa lagu guulaystay in la joojiyo, ka dib markii odayaasha iyo waxgaradka deegeenku dhex-galleen. Waxgarad dhawaanahan ku sugnaa Taleex ayaa dadaal weyn ugu jira sidii ay u soo afjari lahaayeen colaadda labadan beelood dhextaalla oo marar badan soo noqnoqotay, iyagoo kaashanaya dhallinyarada iyo dadka kale ee deegaankaas la daga labada beelood.
Jidadka magaalada Taleex ayaa dhamaantood la xidhay si loo hakiyo gaadiid dagaal oo soo gaadha dhinacyada ay colaadu dhex-maraysay, iyagoo lagu guulaystay in ciidamadii uu ku dhexmaray dagaalka laga saaro magaalada. Amarrada ay guddigani soo saareen ayaa waxaa ka mid ahaa inaan la arki karin wax ciidan ah oo magaalada hub sita, iyagoo ku guuleystay inay ciidamadii geeyaan meel magaalada ka baxsan. Dagaalkan ayaa dad badani cabsi ka qabeen inuu dhaliyo barakac baahsan, balse xaaladda magaalada Taleex ayaa kusoo laabatay gelinkii danbe ee shalay sideedii hore, iyadoo dib loo furay goobaha ganacsiga iyo is-gaadhsiinta. Illaa hadda lama sheegin khasaarahaa dagaalkaasi keenay, haseyeeshee guddi is xil qaantay ayaa soo afjarida arrintan ku jirta.
