Hargeysa (Hubaal) – waxaa maanta Duleedka Burco ka dhacay Dagaal Sababay Khasaare Dhimasho iyo Dhaawacba leh,waxa la sheegay in uu ka dhashay ka dib markii ay laba beelood oo ood wadaag ku ah tuulada Baliga Diiriye Guuleed uu dhex maray.
Dagaalkan oo sida ay ilo wareedyo ka ag dhawaaXaqiijiyeen in uu socday muddo laba saacadood iyo badh ah, ayaa waxa ku kala guntaday ciidamada Booliska oo ka tagay Magaaladda Burco.
Ciidamadan oo uu hor kacayay taliyaha Qaybta Booliska ee Gobolka Togdheer, kuwaas oo kala kaxayeeyay labada beelood.
Labada Beelood ee dirirtu saaka dhex martay oo kala ahaa Beelaha Cabdale Arab iyo Reer Biniin oo ka soo kala jeeda beelaha arab iyo habarjeclo.
Madaxweynaha Jamhuuriyadda Somaliland ayaa hore gudi ugu saaray sidii loo kala saari lahaa muranka dhuleed ee soo kala dhex galay labadan beelood, waxaanay gudidaasi u xukuntay in ay dhulka iska leeyihiin beelaha Cabdale Arab, kuwaas oo marka weerarka lagu soo qaaday saaka ku fooganaa dib u yab-yabida waxyaabihii ay hore uga burburisay xukuumaddu.
