Diridhaba (Hubaal) Suldan cali cabdi xasan-roodhiile ayaa loo caleemo-saaray suldaanka Beesha reer sheikh isaxaaq ee ku dhaqan Magaalada Diridhaba ee Dalka Ethiopia. Xafladda caleemo-saarka oo qabsoontay taarikhda 07/06/14 toddobaadkan gudihiisa ,waxaa ka soo qayb galay dadweyne aad u farabadan oo ay ka mid ahaayeen Suldaanada iyo ugaasyada qoomiyadaha iyo Qabaa’ilka ku nool Diridhaba iyo nawaaxigeeda. Suldaanada kasoo qayb galay waxaa ka mid ahaa suldaanka qoomiyada oromiya, suldaanka qoomiyada Adarida, iyo suldaanada qoomiyada soomaalida ee suldaanka sheekhaashta, suldaanka madigaanka , suldaanka gurguraha, iyo wufuud kale oo ka socotay ciisaha , qoomiyadaha tigree, amxaaro iyo shucuubta koonfurta itoobiya(dhabuub). Goobta Xafladan oo ka dhacday beerta wayn ee layidhaa millennium park iyo Hoolka wayn ee ku yaal Hotelka Tria angle oo ka soo horjeeda beerta xaflada lagu qabtay. Xafladdan oo ahayd mid sifiican loo soo agaasimay waxaa lagu soo bandhigay wax yaalo badan oo Hido iyo dhaqan u ah caleemo-saarka suldaanada. Waxa kale oo xafladani cajiib ku ahayd afafka iyo luqadaha kala duduwan ee ay khudbadaynayeen qoomiyadihii iskugu yimid caleemo-saarka suldaanka beesha reer sheikh isaxaaq ee Diridhaba, ethiopia.
