Waxaa Uu Madaxweynuhu Istiqaallad Ka Diiday Mid Ka Mid Ah Badhasaabbada Dalka oo Dhawaan Is Casilay
Hargeysa (Hubaal)- Warsaxaafadeed xalay kasoo baxay aqalka Looga Arrimiyo Dalkan Somaliland ee Madaxtooyada ayaa lagu shaaciyey laba digreeto oo madaxweyne Siilaanyo xalay soo saaray kuwaas oo midna uu ku magacaabay laba degmo oo cusub midna uu ku diiday istiqaallad uu dhawaan u soo gudbiyey mid kamid ah baadhasaabadda gobollada dalka oo shaaciyey in uu iska casilay xilkii uu madaxweynuhu u magacaabay. Warsaxaafadeedkan oo uu ku saxeexnaa afhayeenka madaxtooyada Somaliland Eng. Xuseen Aadan Cige (Xuseen-Deyr] oo nuqul kamid ahi soo gaadhay wargeyska HUBAAL xalay waxaa uu madaxweynuhu ku magacaabay laba degmo oo cusub oo ka kala tirsan gobollada Sool iyo Togdheer, waxaana uu sidoo kale ku diiray iscasillaadii guddoomiyihii gobolka HAWD Ibraahim Xaaji Cali Xasan. Warsaxaafadeedkaas oo dhamaystiranina waxa uu u dhignaa sidan: “Madaxweynaha Jamhuuriyadda Somaliland, Mudane Axmed Maxamed Silaanyo, waxa uu caawa [xalay] wareegto madaxweyne oo summadeedu tahay JSL/M/XERM/249-5053/102017 uu ku magacaabay laba degmo oo kala ah, Nasiye iyo bohol. Sidoo kale waxa uu madaxweynuhu istiqaaladii ka diiday gudoomiyihii gobolka Hawd.
- Madaxweynuhu:-
Markuu Arkay: Qodobka 90aad iyo Qodobka 109aad, Faqradiisa 3aad ee Dastuurka Jamhuuriyadda Somaliland;
Markuu Arkay: Qodobka 10aad ee Xeerka Gobollada iyo Degmooyinka oo tilmaamaya wax-ka-beddelidda Qaab-dhismeedka Dalka;
Markuu Tixgeliyey: Codsiyada ka yimid Madax-dhaqameedyada, Waxgaradka, Culimada iyo Odayaasha Deegaanka;
Markuu Tixgeliyey: Baahida loo qabo in Degmooyinka Nasiye iyo Bohol loo magacaabo Degmooyin cusub;
Markuu Dhegeystay: Soo jeedinta Wasiirka Wasaaradda Arrimaha Gudaha;
Wuxuu go’aansaday;
- In uu Nasiye u magacaabo Degmo, taasi oo ka tirsanaan doonta Gobolka Togdheer.
2 In uu Bohol u magacaabo Degmo, taasi oo ka tirsanaan doonta Gobolka Sool.
- Ujeeddo: Diidmo Iscasilaad
Ku: Mudane, Ibraahim Xaaji Cali Xasan, Guddoomiyaha Gobolka Hawd .
Mudane Guddoomiye,
Anigoo tix-raacaya go’aankaaga aad warbaahinta ku baahisay oo ku saabsan istiqaaladda Xilka Guddoomiyaha Gobolka Hawd ee aad iska-casishay. Haddaba Guddoomiye, ugu horreyn waxaan aad kuugu mahadinayaa xilkasnimada aad muujisay muddadii xilka Guddoomiyaha Gobolka Hawd aad haysay. Sidaa darteed, waxaan kula socodsiinayaa in aan kaa diiday istiqaalada aad xilka Guddoomiyaha Gobolka Hawd. Waxaan kuu rajaynayaa in aad si hufan u gudato waajibaadka Qaran ee laguu xil saaray, isla markaana aad si laban-laabto dedaalka iyo doorka weyn ee aad ka qabatay Gobolka Hawd ee Jamhuuriyadda Somaliland”. Ayaa lagu yidhi warsaxaafadeedka kasoo baxay aqalka madaxtooyada ee uu ku saxeexnaa afhayeenka madaxtooyada Xuseen Aadan Cige (Deyr). Geesta kale guddoomiyaha gobolka HAWD ayaa dhinaciisa shalay mar uu warbaahinta kula hadlay magaallada Balligubadle oo mashruuc laga daah furayay waxaa uu kaga hadlay diidmada uu kala kulmay dalabkii u madaxweynaha u gudbiyey waxaanu tilmaamay in uu ogollaaday islamarkaana aqbalay go’aanka madaxweyanha.
ALLAA MAHAD LEH
Xuseen Aadan Cige (Deyr)
Af-hayeenka Madaxtooyada JSL
