Xabbaddii Waqooyiga ka bilaabantay 1988 ayaa gobollada oo dhan ku baahday 1989. Waxa laga kacay gobollada dhexe, Jubbada Hoose, Muqdisho iyo meelo kale. Ummaddii la iska hor-keeni jirey ayaa garbo-siman noqotay. Dabkii baa carriga wada gaadhay. Kolkaas buu keligii-taliyihii go’aansaday inuu mucaaridka hadal u furo. Adduun! Hadda waa nimankii uu “afarta injirta leh” odhan jirey. Maansadan Keena-diid waxa dulucdeedu tahay inaan wax wada-hadal ah ama dib-u-heshiisiin ah oo suurto-gelayaa jirin. Waxay dalbanaysaa in laba mid la soo galo: in xukunka la iska dhiibo iyo dirirtu sii socoto.
Maansada dab baa laga helaa, duraha jiilaale
Dareenkiyo waxaa lagu shidaa, daacaddoo qudha’e;
Niman baa dubaalado macmaca, olol dugsoonayne
Mar haddaanay daynabo lahayn, diirsimaad
ma lehe.
Baqal waa dameer waana faras, daawashada guude
Isagoo dirkaba shaabbahuu, dooca gaar yahaye;
Geenyada nin doonaaba koray, looma awr-dayine.
Daridiyo Hadraawoow naxwaha, laaxinkaa dila’e
Kuma daro ninkii fara yaqaan, ararta deel-qaafe
Dhegtaa diidda meeshay xarfuhu, dalab ku yeeshaane.
Ragga laga dambeeyee murtida, daajiyaan ahaye
Dadku waa u weysaysan jirey, Deelleydaan furaye;
An daleeyo caawana miday, hadal ku daayaane
Dawi Ina Gurraasoow safruhu, Dubay ha geeyeene.
Kuwa samaha inay doonayaan, dunida gaadhsiiyey
Dar kaloon aqoon bay wiglada, ula dan leeyiine
Mindhaa Daado iigama fadhiyin, dib-u-heshiisiine;
Hadday nabadi doocaan ahayd, laysu dacareeye.
Waxa lala dardaarmaa qofkii, wax u dambeeyaane
Wuxu dayso leeyahay ma garan, Deex wedkii helaye.
Israa’iilna waa loo dalbaday, dabar-go’aygiiye
Mar haddaan doc ii nooli jirin, wawga darayaaye
Iyagaa dardaar-werin jiree, yaanay dacaroone.
Dab wax guba dabbaabad iyo jiib, doobta kaHiggooda
Inta dawlad taagteedu tahay, waa la ii dumaye;
Wixiiyoo dayuurado onkoda, nala dul gawdiidshay
Dhulka cidi ma daaqdeen siday, damacsanaayeene
Rabbi doobirtii iyo rag baa, lagaga doogaaye.
Sidii duur la gubay bay carrada, qaraf ku daareene
Lama-dego waxaa Herer ka dhigay, dil iyo laystaane;
Dabayl baa ka foodhiday Tog-dheer, degelladeediiye
Dummaddooda weeyaan wixii, moora-duug dhacaye.
Iyagaa khalqiga dayriyee, yaan la daydayine
Raggii calanka deyrka u ahaa, dide Cubeeshoowe
Kolkii loo dub-nixi waayey bay, dabarka goosteene.
Dubur iyo wuxuu Hawd ka galay, shicibku Daadayse
Dul-cad baa xeryaha looga dhigay, duluglahoodiiye.
Haddaanaan dagaalamin nafluhu, nama daneeyeene
Darmo lay fidshaa kama horrayn,dooraddaan dhigaye.
Dawo laguma raadsheen raggii, loo darraan jireye;
Dubbahaygi weeyaan hadduu, dumay gidaarkiiye
Intii baan dad ii soo shiriyo, daanya-qaad helaye
Intii baan dul-saarkii ka baxay, laygu duudsiyaye
Intii baa sidii dawladeed, lay dabbaal-degaye;
Digta kaaraheey geelayaga, doolay mahadsheene
Ducana nooma kicin jeer warmaha, laysku deeddamaye.
Dhibta waw dul leeyahay hadduu, ruux dan leeyahaye
Annakana diraacdiyo colkii, noogamay darine;
Ninna danabyadiisii ma tebin, haadku daaligaye
Daar iyo wixii maal burburay, duudsi baan qoraye.
Wixii daranba Geneyoow wax baa, kaaga sii darane
Intay daabka haystaan mindida, nololi waa duufe
Waxan duunyadaydii u hurey, mar ad is-daysaane.
Intaan nabadda daafacay haddaaan, col u daruureeyo
Mar horaan danteey gaadhi laa, Cali-durraanoowe;
Wakaa fooshay daalacan xaqeey, dedan ku sheeleene
Waxa deeqay warankii dhegtii, diidday waanada’e;
Goortii duduuciyo “kir”tii, lagala soo daalay
Loo gurey dameeruhu usheey, dabac-yaqaaneene.
Imminkay la deedaabayaan, dakharradaydiiye
Waa dabatadoodii waxaa, daadsan kaymuhuye;
Sidii deero lagu yeedhay bay, dabada jeedsheene
Dulucii islaamaha la eed, Ina Ducaaloowe.
Iyagoo “dig”teedii Tog-dheer, weli dedoonaaya
Oo doogihii Herer qabaan, Saylac soo dagaye.
Ummulaha kuwii dooxan jirey, Daalo laga saarye
Warku durug Kismaayana siday, ugu dalaabeene
Ka dabbaalan maayaan bad bay, dalaq yidhaahdeene.
Malmalkiyo dab-qaadkii sidii, laysu daba-qaaday
Waagii dillaacaba naxdinno, dihin ma waayaane;
Ma dambayso maantana hadday, Xamar ka dayrsheene
Intii horeba daaweey lahayd, daannadaan dhigaye,
Allaylehe haddaan doonnidii, qoomay dakhalkiiye.
Nin kastoo dambeedsadayba waa, laga dambeeyaaye;
Rag hadduu Dayuuroow laftiyo, duunka ka colloobo
Mid uun baa hadday deedamaan, “dugay” ka
raacdaaye,
Iyagoo dureertada ka jaban, dani hadday keentay
Waa guul Ilaah nala damcoo, loo dadaal-galaye.
Kolkaan shalay inoo daaya laa, nabaddan loo daabtay
Dannigooda may gelin mar baa, loo darsanayaaye;
Imminkay sidii doollar kacay, dahab ku raadsheene
Anna waxan dalluuntawgu riday, rag is-dareensiiye
Jeeroo dabkaygii wax gubay, layma soo dayine.
Daw baan u leeyahay haddii, doorkan lay tebeye
Waxaan degemsanaadaba markaan, diiray lay baraye
Inaan duulin karo layla arag, samahay diideene;
Goortaan ku daadduumiyey, “dala” yidhaahdeene
Waa dulin suntiisii la helay, maanta dabadeede.
Noomaysan daaheen hadday, duuli karayaane
Waxay dib u fadhiisteen kolkaan, “deeliyaa” idhiye;
Alla-doori tiiqtiiqsigii, door umuu dhaline
Gabbalkooda dumay waa shacbiga, waa u daalacaye
Anna wawga darayaa hadday, maanta dagan yiine.
Nimay noloshu deel-qaaf ku tahay, iima duur-xulo’e
Dhego waxay dalooleen intaan, dakharku weynaane;
Waa taan dubaaq loo lahayn, dela-wadhkaygiiye
Imminkana dillaacaan lahayn, meel dawaar maro’e.
Amba dhiig ma daadsheen haddii, daawo nooshahaye
Badh-daloolka iyagaa ka dhigay, diin la aammino e
Waxan dirir guddoonsaday markaan, waayey daw kala’e.
Dacalkaa Ilaah noogu xidhay, duul habaar qaba’e
Waa waxa dusuuddii guryaha, geystay meel darane.
Wuxuun baa hadday dawlad yiin, laysla dayi laaye
Ma oggola dad-weynuhu wixii, goostay daahyada’e.
Shilna wayna daan-weyn intay, duubka xidhan yiine
Dabaday ku qarin layd hadday, riyi dub leedaaye
Waxba yaan gal soodhkii dafiray, lagu ma-diidayne.
Wax dhaaxaan durraansaday Rabbigay, daraygay yaalliine
Dillo ma leh haddooy ii jabeen, naqas ka sii daaye
Dihan maayo caawana hadday, duco yidhaahdeene.
Iyagoo dareeriyo inay, dunidu ceeryoonto
Inoo doora labadaa mid dhaha, hadalki oo duuban.
