Marka aad ka nasato hawl, mid kale ayaa curanaysa. Dhambaalkani waxa uu moos u yahay eedo la ii jeediyay 21kii Julaay 2014ka oo la igu xidhay madaarka Hargeysa, kaddibna la igu wareejiyay sirdoonka Gobolka Maroodijeex oo ku fashilmay in ay caddeeyaan eedo aan i qaban oo ii jeediyeen. Waa daw haddii aan idhaahdo “labaduba waa argaggixiso iyo aafo qaran”.
waa qalinkii Siciid Maxamuud Gahayr
Waxay maansadu tidhi
Nin ujeeddo yeeshay
Hadba oog ku shidayaan!
Nimay oomiyeenbay
Ku tilmaamayaan aar
Hadba kii “uf” diiday
U abuurayaan koox
Ku afuufta naar kulul!
Erey gaalku soo faray
Ma adeegsan karayee
Inta aan ogsoonahay
Argaggixiso ii tiri
Ortan Saalax waa kow
Inankii Togdheer iyo
Abtigayna waa laba
Dhidar waa Usaamiyo
Awlaad la doorsaday
Abwaan Jaamac kii shaah
Oogada ku daadshiyo
Dugulaan asteeyee
Miyaad aashan dhaaddeen?
Abaanduulahoodiyo
Muxsinow ul baad tahay
Agnaan aan i daw-bixi
Abbaartayda garanayn
Eeddana an hubin karin
Ooftiina dhaaftaye
Haddaan Kawsar ololaa
“I ayaamo dhawr” odhan
Boqorkaa abraariyo
Haddaan Raabbi eeggadan
Ku maqnayn Awaarii
Nin af-duub la daydayo
La arkee dhawaanahan
Ma anoo arbe ah buu
Atoor ii hanjabayaa!
Odaygeenna maan garan
Ictisaam dugsanayee
Ingiriiski wuxu yidhi
“Eri dhawr wasiir oo
La irdheeyo Jaallow”
Andacoodka beenta ah
Inkir oo runtii diid
“Ragga aan asluubtiyo
Anshaxooda bogay baad
Uskagow dafiraysaan!
Oksajiin la’aanteed
Aadame ma jiri karo
Masuulkaad inkiraysaan
Adhaxdayda weeyaan
Al-shabaab ma noqon karo
Af-legaaddadaa tuur”
Qoolcaday ayaantaan
Ifka jiray gu’ kow toban
Ambaqaad xafiiskii
SOMTEL loo alkumayaan
Arkay jaalle dhaayee
Adhigiyo haddii geel
Anfac quud la siin rabo
Inaan oodo mooyee
Inaan awdo maankiyo
Ubucdaba ma gelin karo!
Adaan oofin wacadkii
Hadba waxad af leedahay
“Iniq maad i yara sugi
Abti saacad noo qabo
Jigjigaan aheey tegay
Maantana akhyaar baan
Wajaalii ku ururshoon
Iibkooda wiilyahaw
Adduun baan ku qaatee
Bal i eeg dharaar kale”
Wuxu kala il-daranaa
Axmaq iyo dhashiisow
Aboodiyo dhurwaayow
Ayax iyo abeesow
Aadu iyo horjoogow
Arradaye sidee baan
Kuu sii asturayaa?
Warka lay abshiray iyo
Galaydh oo amaamuday
Khaatumo la eel-baday
Wixii aan ka odhan laa
Adaa oogta igu shiday
Iyagaan ka filayaa
Arxan iyo abdiyo sharaf
Umal-dooxa yaa dhigay?
Axmed Xaabsadii mee?
Fuaad aaway maan arag
Indhawayd halkuu tegay?
Hadday ubad dhawaaqaan
Illimaha dhulkii Sool
Askar iyo bilayskani
Aafiyo lur mooyee
Amni may xilqaadaan?
Af-weynii labaadow
Aaminkii adaa dilay
Haddii aad unuunkiyo
Ajashayda haysaan
Eebbe waan u simannee
Mar horaydun “oofsada
Arjumoo diloo jara”
Ereygiinnu noqon laa
Arbushtaye Togdheertii
Horta eelkan yaa qoday?
Aramida kumaa dhigay?
Aafada ninkee jecel?
Ma waxaad abqaashiyo
Ilaaqdaada faaftuu
Wasiir oollin karayaa?
Istaadhaye kumaa demin?
Uur-ku-tuullo iyo holac
Alalaas ku kicisaye
Eber yaa halyeygii
Ansax ugu xaquuq diray!
Aar Faarax Nuuriyo
Ismaaciil Miraan hore
Agab qaadin weligood!
Anfariirka ceelkiyo
Xogta awgu uu yidhi
“Ehel baa halkii aan
Oollaa la siiyee,
Asqoobee na ciidmaay”
Ururkaagu waa hoog
Aakay dhacaayiyo
Asaraartan lagu jaro
Ubax iyo malyuun wiil
Afo seyga laga dilo
Agoon maanta curatee
Axmedow adeerow
Bal ishaaradaydiyo
La eegee waxyeelladu
Halka ay iniin iyo
Ugxanteeda dhigatiyo
Ninka ooya ciilkeen
“aammus” loogu taag helin
Iskuulkii Maroodiga
Irridkaad u laabteen
Eeriyo hirkaygii
Allayl baa u dhacay dama
UDUB taan beddelay iyo
Idinkuba awowooy
Inan iyo waxaad tiin
Aabbihii tilmaamaha
Urugiyo haddaan way
Far qaniini-laa ilig
Waxa ii ah uugaan
Ufo iyo naruuraba
UCID iyo WADDANI kay
Hadbay uunku doortaan
Madashaay ha iilane
Adkee hawsha qaran iyo
Axdigaynnu leennahay…
Haddii diin la eegana
Anigoo dhallaanaan
Ahaa Sheekh Maxmuudkii
U akhriyay Tafsiirkee
Inta ii ah marag iyo
Oday Deeqba weydii
Ayniga intaan jiray
Mar uu aabbahay yidhi
“Awgaygi weeyaan”
Hadduu jeel albaab yahay
Rag ku yahay af-kala-qaad
Waxa ii agaasimay
Istoodhkiyo qolkayba
Adowgaan ka beermoo
Akhris maalintaan gabo
Orod aan ciyaar tago
Ama wadhaf abaabulo
Ollogayga dhaawaco
Illaw aan duruus naco
Ummo hooyo weydii
Allaylkii anoon jirin
Da’ islaamku qaangaadh
U aqoonsanaan karo
Iftin li’ yidhi “xidha”
Halkii aan ilayskiyo
Nal la oonsadaa jirin
Bisaddii alluubnayd
Agagaaraydaa
“Miyaw” oogsatoo ooy
“Aadamow furaay” tidhi
Adadaygga fiidkaas
Indhihiyo ibtaydaan
Ilaashoo ma buuqine
Ukun baad i mooddaye
Inamaalka foolkiyo
Adayg dheemman baan ahay
Aysiidh da’daan ahay
Markuu ooyo nacabkuna
Farxad baan la aadaa
Ufuqiyo cirkaa farax!
Muxuu jiir ilkaa daran
Ku af-qoday qolkaygii
Awaalkii mas baa yimi
Maxaan oof-wareen iyo
U adkaystay xaal daran
Oogada bustaan jirin
Oodkac layma siinayn
Isbuunyaan la ii dhigin
Eedaad intaan maray
Ummo hooyo waa xay!
Anigoo itaal daran
U arooray dhawr mayl
Anigoon af gelin quud
Arahdii duruustaan
Ku afuray yaraantii
Uunkoo badh seexdaan
Aayadaha Quraankaa
Ardaynimo masjidkii
Keli-aaday maandhow
Kab haddii la aasana
Cagaag baan ordaayee
Ma nin aayar lacag iyo
Ulashiyo riyaaq lura
Lagu iibsadaan ahay?
Haddii aad imaamkii
Ood-dhacmeed dulsaarteen
Usha booca goluhuu
Ugu fuulay awrkiyo
Halkee aashi maraysaa?
