Kulankaas Waxa Lagu Lafo-Guray Wadciga Dhaqaalaha Iyo Nidaamka Maaliyadeed Ee Ka Jira Somaliland
Nairobi(Hubaal)- Waxa Xarunta Dhexe ee Baanka Adduunku ku leeyahay Magaaladda Nairobi kulan ballaadhan oo saacado qaatey ku dhexmaray wefti ka socda Jamhuuriyadda Somaliland oo uu hoggaaminaayo Guddoomiyaha Baanka dhexe Cali Ibraahim Jaamac (Baqdaadi). Xubnaha Weftiga dhinaca Somaliland waxa ka mid ahaa Guddigga Dhaqalaaha u qaabilsan Golaha Wakiillada oo ay ka mid ahaayeen ku-xigeenka Guddoomiyaha Guddida Dhaqaalaha Xildhibaan Maxamed Axmed Obsiiye, Xildhibaan Xuseen Maxamed Cigge, Xildhibaan Siciid Maxamed Cilmi, Xildhibaan Cabdiqaadir Jibriil Tukaale iyo Cabdinaasir Cismaan Maxamuud oo Agaasimaha Qorshaynta Golaha Wakiillada. Waxa kale oo kulanka ka qayb galay Cabdirahmaan Muuse Agaasimaha Waaxda Korjoogaynta Hay’adaha Maaliyadeed ee Baanka Dhexe iyo Mudane Axmed Maxamed Nuur oo ka mid ah hagayaasha Mashruuca “SCORE” kana tirsan Wasaaradda Qorshaynta Qaranka.
Waxa sidoo kale shirkaas kasoo qayb galay Agasimaha Guud ee Wasaaradda Qorshaynta Mudane Cabdirashid I. Cabdirahmaan. Dhinaca Baanka adduunka waxa hoggaaminayey Wakiilka Baanka adduunka ee Somalia iyo Somaliland u fadhiya Kenya, Mr. Hugh Riddell iyo Madaxa Barnaamijka Score Mr Thilasoni Benjamin iyo Fuaad Sharif oo ah khabiir arrimaha Maaliyadda. Kulankaas waxa lagu lafo-guray wadciga guud ee dhaqaalaha iyo nidaamka maaliyadeed ee ka jira Somaliland, xeerarka ku saabsan habaynta iyo toosinta baananka ee horyaala Golaha Wakiiladda iyo guud ahaanba tayaynta iyo taakuulaynta uu Baanka adduunku u fidiyo hay’adaha kala duwan ee ka hawl gala Somaliland. Dhammaan qodobbadii laga wada hadlay si fiican ayaa laysula meel dhigay.
