Laascaanood (Hubaal)- Weftigii uu hoggaaminayey Guddoomiyaha Golaha Wakiillada Somaliland, Baashe Maxamed Faarax iyo Wasiirka Arrimaha Gudaha, Maxamed Kaahin Axmed, ayaa la kulmay Guddidii dhex dhexaadinta labada ardaa ee walaalaha ah ee ay dirirtu ku dhex martay dhowaan koonfurta gobolka Sool. Wasiirka Arrimaha Gudaha Somaliland Maxamed Kaahin Axmed, oo ka hadlay shirkaas ayaa sheegay in kulankani yahay shirkii lagu qorshaynaayey ajandaha shirka Nabadaynta beelaha diriray ee ay colaadu ku dhex martay Koonfurta gobolka Sool, kaas oo furmi doona maalinta Sabtida ah toddobaadka dambe. Guddoomiyaha Golaha wakiillada Somaliland Baashe Maxamed Faarax, ayaa sheegay in loo baahan yahay in labada beelood ay dib ugu noqdaan degaanadoodii dadka degaankana u sheegaan in la heshiiyey, kuna guubaabiyaan adkaynta nabadgelyada. Weftiga Guddoomiye Baashe waxay maamulka gobolka Sool iyo ka degmadda Laascaanood, iyo cuqaasha gobolkaasba ay uga mahad celiyeen sidii ay ula shaqaynayaan, iyaga oo horena si wada jir ah u soo wada maray degaanno kala duwan oo gobolkaasi kamid ah.
