Doodo Ka Shidaal Qaatay Garaadka Siyaasadeed Ee Guddoomiyaha WADDANI Iyo Wakiillada Oo Ka Deyriyey Xog-ogaalnimadiisa Fadeexad Ku Ah Milgihiisa Dublamaasiyadeed
GUDAHA KA AKHRI: Minqiyaaska Gef Aan Qiil Loo Helin Oo Guddoomiye Cirro Kaga Been Sheegay Muddada Laga Joogo Milaygii ay Xornimadu Ka Dhalatay Xeebtaas
Hargeysa (Hubaal) – Ra’yul caamka bulshada ee u dhuun dalloola geediga siyaasadeed ee saddexda hoggaamiye ee Axsaabta Qaranka Somaliland ayaa ka falceliyey fadeexad min qiyaaskeedu ka shidaal qaadanayo xog-ogaalnimada iyo raad raaca taariikheed ee guddoomiyaha Xisbiga WADDANI Ahna guddoomiyaha golaha Wakiillada Somaliland Md. Cabdiraxmaan Maxamed Cabdillaahi, kadib markii uu gef ula kac ah ku duudsiyey xuquuqda ay shacbiga reer Jabuuti ku leeyihiin muuneynta dabaal-degga ay ku xusaan maalintii ay xornimada ka qaateen gumaystihii Faransiiska oo ay dhawaan u dabaal-dageen sanad-guuradii 39aad ee kasoo wareegtay habeenkii ay calanka qaateen.
Dhambaal Meel Ka Dhac Ku Ah reer Jabuuti Oo Guddoomiye Cirro Ku Beegay Xornimadooda
Dhambaal xambaarsanaa hambalyo iyo bogaadin farxadda qarannimada la qaybsanaya shucuubta reer Jabuuti oo sanad kasta habeenka ay bishu tahay 27-ka July xusa xornimadooda Ayaa biya dhaceedu ku suntamay Fadeexad gef ku ah meeqaamka Mas’uuliyadeed iyo mida aqooneed ee Guddoomiyaha xisbiga mucaaridka ah ee WADDANI Guddoomiye Cabdiraxmaan Maxamed Cabdillaahi, kadib markii uu khalad aan laga cudur daarin amaba dib loo sixin uu ku qalday xilliga dhabta ah ee ay xornimada qaateen reer Jabuuti iyo weliba sanad guurada ka soo wareegtay 1977-kii. Sida ku cad War-saxaafadeed uu soo saaray guddoomiye Cirro oo maalintii isniintii ee bisha June ahayd 27, 2016 ka soo baxay xafiiska warfaafinta xisbiga WADDANI oo nuxurkiisu xambaarsanaa hambalyo uu dareenka reer Jabuuti kula qaybsanayo xornimadooda ayaa noqotay gebi ahaanba mid baalmarsan macnaha maalinta xornimada Djibouti. War-saxaafadeed lagu faafiyey hambalyeynta Guddoomiye Cirro ee dalka Djibouti, ayaa lagu sheegay in dalkaasi uu xorriyadiisa qaatay sannadkii 1960-kii, sidoo kalena lagu ladhay in sanad guurada dabaal deggeedu ka soo wareegeen toddoba iyo soddon sanno, halka ay taariikhda saxda ah ee sanadka ay xornimada qaateen ka tahay 1977-kii isla markaana 39 laga joogo sanad guuradeeda.
“Guddoomiyaha WADDANI waxa uu hambalyo u dirayaa dawladda iyo shacabka Dalka jamhuuriyadda Djibouti, isagoo ugu hambalyeynaya sanad-guurada 37-aad ee kasoo wareegtay maalintii xornimada ee ay ka qaateen gumaystihii faransiiska 27-kii June, 1960-kii,” ayaa lagu yidhi war-saxaafadeedka hambalyeynta ah ee uu Guddoomiye Cirro u diray dalka Djibouti. Dhinaca kale qaar kamid ah indheergaradka bulshada ee [Intellectuals] loo yaqaanno ayaa fool xumo ku tilmaamay fadeexadda uu Qoraalkani huwanaa, iyagoo dhawrkii maalmood ee la soo dhaafay siyaabo kala duwan u naqdiyeyay khaladkaas ka dhanka ah dublamaasiyadda iyo hab-dhaqanka siyaasadeed ee ummadduhu isku weydaarsadaan munaasibadaha noocan oo kale ah. Sida ka muuqatay doodo iyo xog is weydaarsiyo habeennadii la soo dhaafay ay ra’yul-caamka bulshadu isku weydaarsanayeen baraha xidhiidhka bulshada ee Social Media-yaha loo yaqaanno Waxaa ay badankoodu ka midaysnaayeen sida uu xisbiga WADDANI iyo hoggaankiisu uga arradan yahay taariikhaha dawladaha deriska ah oo dhaawac siyaasadeed oo culus ku keenaysa.
