“Waxa Gudidani Isku Waafaqeen inay si siman ula wada dhaqmaan saddexda Musharax ee hankooda iclaamiyay kana dheeraadaan wax kasta oo kala qaybsanaan ku keenaya beesha Ay Gudoonka U Yihiin”
Hargeysa(Hubaal) – Gudida Beesha degta galbeedka iyo woqooyiga Magaalada Hargeysa ee Sacad Muuse oo ka kooban 25-Xubnood oo maalmihii u dambeeyay kulamo xasaasi ah ku lahaa goobo ka tirsan magaalada Hargeysa ayaa la sheegay inay isku raaceen inaanay wax faro galin ah ku samayn siyaasiyiinta hanka hogaamineed u hanqal taagaya ee ka tirsan beesha kuwaasi oo hore gudida loogu soo jeediyay inay hab nin jeclaysi ah u sii kala saaraan balse gudidan oo habeen hore kulankan ku yeelatay Hargeysa ayaa dood adag kadib isku waafaqday inaanay u kala hiilin musharaxiinta hankooda bidhaamiyay ee ay dhex u noqdaan iyagoo hoosta ka xariiqay in hadii ay isku dayaan inay kala saaraan ay keeni karto kala qaybsanaan iyo kala fogaan ku timaada beesha ay gudoonka u yihiin ee Sacad Muuse.
Sida warkani aanu ku helnay,gudida horumarinta Beesha degta Galbeedka iyo woqooyiga Hargeysa ee Sacad Muuse oo 25-ka xubnood ka kooban oo lagu soo doortay shirkii beeshu ku qabsatay Deegaanka Agabar ee Woqooyiga Hargeysa sanadkii hore oo maalmihii u dambeeyay shirar gooni gooni ah ku lahaa Magaalada Hargeysa oo ay daba ka riixayeen shaqsiyaad dan gaar ah lahaa ayaa habeen hore oo ay kulan ku yeesheen Magaalada Hargeysa si weyn uga dooday nuxurka qoraal loo soo gudbiyay oo ku salaysnaa inay gudidu sii kala saarto musharaxiinta hanka hogaamineed hayo beesha ka tirsan ee ilaa hada iclaamiyay inay tartanka musharaxa madaxweynenimo u taagan yihiin madaxweyne Siilaanyo Dabadeed oo ilaa imika tiradoodu dhan tahay ilaa saddex Musharax, Gudidan ayaa kulankan aad ugu dheeraatay kana falanqootay cawaaaqib xumada ay beesha ku keeni karto in ay iska yidhaahdaan hebelaw iska hadh iyo hebelbay beeshu wadataa,iyagoo si gaar ah u qaadaa dhigay saddex Cabdicasii Maxamed Samaale,Maxamed Biixi Yoonis iyo Muuse Biixi Cabdi oo beesha sacad Muuse ka soo wada jeeda islamarkaana si waadax goob fagaare ah ka sheegtay inay u taagan yihiin Tartanka musharaxiinta madaxtinimada ee ka dhex loolami doona xisbiga kulmiye gudihiisa madaxweyne siilaanyo dabadeed.
Gudidan oo todobaadkan si guur ah kolba meel shir ugu galaysa islamarkaana si gooni gooni ah ula soo kulantay Wasiirka Wasaarada Maaliyada Somaliland Md Cabdicasiis Maxamed Samaale Iyo Gudoomiyaha Xisbiga Kulmiye Muuse Biixi Cabdi balse aan wax kulan ah la qaadan Maxamed Biixi Yoonis ayaa habeen hore shir ay ku yeesheen Hargeysa ku soo soo afmeeray kulnamadoodaasi kadib markii ay isla bud-dhigeen inaanay suurta gal ahayn in siyaasiyiinta reer ka ee hanku hayo hab nin jeclaysi ah loo sii kala saaro taasina ay ka hor iminayso wixii loo doortay ee ahayd inay isku duubnida reerka tixgaliyaan kana dheeraadaan wax kasta oo Beesha ay gudida u yihiin ku keeni kara kala qaybsanaan iyo burbur,waxa la sheegay inay jiraan shaqsiyaad ka mid ah Gudidan oo aad ugu dhegganaa inay suuliyaan ama ay meel mariyaan wax loo soo jeediyay balse markii ay daraasad sameeyeen islamarkaana indha indheeyeen sida la sheegay deegaanka ay ku nool yihiin iyo cida kula nool iyo sida ay arimaha noocan oo kale ah ay qayrkood u maareeyeen ayaa waxa ay isla garteen inay gudi ahaan ka dheeraadaan inay wax go’aan ah oo lagu kala door bidayo saddexdaa musharax ka soo saaraan,waxaana la sheegay inay kulankaasi oo aad dareen ugu dhaliyay dhalinyarta iyo wax garadka beesha Sacad Muuse uu sidaasi ku soo afmeermay.
Foorenews.com
