FG: Abwaan ma ahi. Waxaan filayaa inay I godlisay (Haddiiba godol jiro) dhacdada ugubka ah ee buuga lagu gubay magaalada Hargeysa ee sida wayn loo qoray iyo malaha buugaa magaciisa ayuun baan warbaahinta kala duwan iyo asxaab ka hadlaysa oo ka doodaysa la kulmay. Dabadeena Gidaarkayga Foolgaradka (Facebook) ayaan ku qoray 14 tuduc ee hore.
Waxa qoray oo Curiyay Xamse Craxmaan Khayre, 9/30/2016. hamse.khaire@gmail.com
>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>
Waxaan taagan nahay halka goolada ah labadda wadda ee sayladda iyo ta garoonka caalamiga diyaaradaha ee Cigaal ku kala baydhaan, waana isla halka dayrka Dugsiga Sare Maxamuud Axmed Cali dayrkiisu ka bilaabmo,. Baabuurta taagan ee taraafikadu kala horayso ka sakow,waxaa jira dad iyaguna meesha ku buuqsan. Dadku waxay ku soo xoomeen oo ay ku urursan yihiin 19 nuqul oo ka mid ah buug dhawaan soo baxay oo la yidhaa “Gurrac” oo qoray Mudane Khadar Cabdi Cabdilaahi. Ardayda, Macalimiinta iyo dadwaynaha urursan waxaa weheliya dhir meesha buugta lagu gubayo ku taal oo iyadu wada hadlaysa oo ka xun buuga la gubayo. Iyadoo anigu si gaar ah aan u xiisaynayo ayuu sheekadda dhirta ayu geed Galool ah oo saarnaa gaadhi xamuul Dhige-dheere ahaa taraafigu hakiyay. Haa geed Galool ah baa gaadhi saarnaa! laakiin isagoo dhuxul laga soo dhigay oo jawaano ku jira weeyi.
Galoolkaa dhuxusha ahi wuxuu ku biiray dooddii dhirta iyadu meesha ku taalay oo garan-waaa ka mid yahay. Wuxuu leeyahay baha-dhireedeey, oo waliba garan-waa iyo gundhocooy ma iyadoo agtiina ay taalo dhuxul oo anigaygan la igu sii wada suuqa dhuxusha si mar labaad la ii shito ayaad buug la gubay u garowdeen. Way idiin gaadhay buu ku leeyahay. Wuxuu ku sii darayaa in xaashiyaha iyo jaldhiga buuga laftiisu markii hore laga sameeyay geedka gobka la yidhaa iyo dhir kale.
Galoolkaasi isaga oo aan dhamayn garnaqsigiisii, garan-waa, gucundho, miraa-miri, baxarasaaf iyo xayaabna aanay jawaab soo celin balse yaaban yihiin ayuu askari taraafikada ahi ku qayliyay dirawalkii gaadhiga galoolku saarnaa. Xawaare aad ah ayaanu ku dhaqaaqay inkasta oo Galool hadalkiisii sii watay wuu fogaaday. Waxa keliya een maqlayayna wuxuun buu ahaa guux aanan garan Karin !. Intaa wixii ka dambeeyay, waxa ka warami cid dhuxusha gaadhiga la saarnayd. Adiga ahaayaana mooyi?
Dhinaca kale buugga maan akhriyin. Maansadan Gurracna waxay ku salaysan tahay sheeko kale oo gurrac ah oo dhacdada buugga la baxay Gurrac ee la gubayay ka barbar dhacday (dhab uma dhicin balse waa khiyaal) balse aan indhaheenu ka gadaaman yihiin. Iyaddoo Gurrac ah oo deegaankii xaalufisay bay Gurrac gubaysaa……….. Waa wadda gurrac.
FG: Abwaan ma ahi. Waxaan filayaa inay I godlisay (Haddiiba godol jiro) dhacdada ugubka ah ee buuga lagu gubay magaalada Hargeysa ee sida wayn loo qoray iyo malaha buugaa magaciisa ayuun baan warbaahinta kala duwan iyo asxaab ka hadlaysa oo ka doodaysa la kulmay. Dabadeena Gidaarkayga Foolgaradka (Facebook) ayaan ku qoray 14 tuduc ee hore.
Guuleed Axmed Axmed Cumar ayaa igu dhiirigeliyay inaan ka dhigo maanso dhamaystiran. Wuxu yidhi waad karaysaa, waan isku dayay isna wuu ila tiir-tiiriyay madaama uu iga abwaansan yahay.
Wuxuu Yidhi:
- Garan-waa dooday baa yidhi
- Gudin aan ku jirn baa
- Anigaba igu garaacdaan
- Gurrac toos ah baan jira
- Guray midiga baa jira
- Guur furid ah baa jira
- Gefaf caadiyaa jira
- Gabadho wiilalaa jira
- Wiil gabadha baa jira
- Iyagoo isu gaysan baa jira
- Gadh bidaar ah baa jira
- Gubitaanku waa maxay?
- Goormaad jabteenoo
- Ka go’deen aqoontii?
- Galool baa ku soo baxay
- Markaa gaadhi saarnaa
- Doodiina soo gaadh
- Waxse aanu wali garan
- Sheekadan gurracanee
- Buugga loo goleeyee
- Laga wada garaabee
- Dhamiba bah geedii
- Ka gar-naqayso idilkeed
- Gadaashoodna ay taal
- Dhuxushii la soo gubay
- Garan-waa buu weerary
- Wuxu yidhi garaad li’id
- Ma adaa lagu gumaadaa?
- Gudinteed is aragteen?
- Gunta wali ma lagu jaray?
- Moofo intay ku galiyeen?
- Suuq may ku geeyeen?
- Gini may ku siisteen?
- Girgire may ku saareen?
- Anaa gaari la igu yahay
- Anaa geesi la igu yahay
- Gasiinkaan u kariyaa
- Gaajadaan ka bi’iyaa
- Iimana garaabaan
- Galabtana warkiinani
- Ka gun dheer intaase
- Garashaad se hadasheen
- Buugani halkuu galo
- Aan idiin gardaadshee
- Gunta weedhahaygaa
- Isaguba guyaal hore
- Gob la soo gumeeyoo
- Ged kaleeto loo dhigay
- Gidigiisu weeyaan.
- Gumareey nasiibkaa
- Kol haddii guban ilaa hawd
- Geyigii bilnaan jiray
- Garan-waa u mudanyoo
- Dhirta inan gumeedkiyo
- Goosan kelidii nooliyo
- Gucundh iyo xayaabiyo
- In kale guraangari
- Gedahaaga joogaan.
- Isagoo gunteediyo
- Wali gaadhin sheekada
- Halka ay ku gobo tidhi
- Ayuu Geelihii waday
- Dhuftay gaadhigiiyoo
- La galbaday warkiisii
- Guux buu se sii waday.
- Hadalkiina muu gu’in.
