Hargeysa (Hubaal) Golaha guurtida Somaliland ayaa maanta cadeeyay inay ka diideen codsi uga yimid madaxweynaha Somaliland Axmed Maxamed Maxamuud Siilaanyo, kaas oo ahaa in golaha guurtidu wax ka badalaan go’aankoodii hore ee muddo kordhinta ee dhigaayay in doorashada la qabto sanadka 2017, oo ay waafajiyaan heshiiskii saddexda xisbi iyo xukuumadda ee dhigaya in doorasha la qabto December 2016.
Kalfadhigii 57-Aad ee Golaha Guurtida Somaliland, oo si rasmi ah u furmay ayaa waxa kudhbad kahor jeediyay mudanayaasha golaha guurtida, Ku-simaha guddoomiyaha golaha guurtida, ahna guddoomiye ku xigeenka koowaad ee guurtida Siciid Jaamac Cali. Mudane Siciid Jaamac Cali Waxa uu u sheegay mudaneyaasha inaanay jirin wax laga bedelayo go’aankii golaha guurtidu muddada ugu kordhisay Xukumadda iyo wakiillada ee ahaa in dalka doorashada laga qabto March 2017, April 2017 xilka madaxnimo lala kala wareego. “Dastuur baa hay’addo lagu yahay, dastuurka ayaa kala qaybiyay hay’ad walba awooddeeda. Dastuurku muddo kordhinta golaha xukumadda iyo golaha wakiillada wuxuu u siiyay golaha guurtida, iyadoo la tix raacayo qodobo dastuuri ah, cid kasta oo khilaaftaa waa cid ku xadgudubtay dastuurkii qaranka ee aan dhigannay. “Muddo kordhinta guurtida Heshiis lagama gaadhi karo, go’aan kale lagama soo saari karo, wax jira oo sharci banneeyay heshiis lagama gaadhi karo” ayuu yidhi Mudane Siciid.” Ayuu yidhi guddoomiye ku-xigeenka guurtidu.
