Hargeysa (Hubaal) Hal qof ayaa ku dhintay kadib markii uu galabta dooxa tuulada Aw-Barkhadle ee Bariga Hargeysa uu qaaday Gaadhi Xamuul ah oo ka yimid magaalada Berbera ee gobolka Saaxil.
Guddoomiyaha tuullada Aw-barkhadle Mahad Maxamuud Gahayr, oo u waramay wakaallada wararka Somaliland ee SOLNA, ayaa sheegay in daad xoog leh oo ka soo rogmaday dooxa Aw-barkhadle uu la tagay Baabuur nooca loo yaqaano waaraadka ah oo siday khudrad kana yimid magaalada Berbera.
Guddoomiyuhu wuxuu Tilmaamay inay maydka ALLE ha u naxariistee dirawalkii Baabuurkaas oo la odhan jiray Marxuum-Maxamed Cabdilaahi (Ina Caga-saydh) ay ka heleen goob shan kiiloo mitir u jirta tuulada Awbarkhadle. halka kirish-boygii gaadhigaas bulshada degaanka Aw-barkhadle ay badbaadiyeen.
Guddoomiyaha magaalada Aw-barkhadle Mahad Maxamuud Gahayr wuxuu intaas ku daray inay ciidan dhigeen dooxa Aw-barkhadle si ay gaadiidka uga horjoogsadaan inay isku biimeeyaan daadkaas, waxaanu gaadiidleyda ku booriyey in aanay ku degdegin inay maraan dooxyada daadku socdo, iyadoo sannad kasta ay dad ku dhintaan baabuurta daadku qaado.