‘Biibiisidani, Biibiisidii Maaha Berigii’- Ereyada Maansadan Oo Hal-ku-dhegeegu Yahay Beerlaxawsi
In dhaweydba waataan Baraxay, bowdkii maansada’e,
Mid barooya maan tirin, Xiligaad iiga barateene
Inaan kala baqoolaan ku waday, Baylahdii gabaye
Baabkiisa anigoo xidh idhi saan u kala baadno
Ayuun buu shalay goor barqo ah, goohu ii baxaye
Kolkaasay iyaba waa balwade wax isku beegmeene
Shan haloon isuba baadi noqon, aan ka biliq siiyo
Biibiisidani, Biibiisidii maaha berigii
Waa baahintii Muuq-dishaad oo badhaxla wiilowe
Buunniyadii Murtida iyo naxwahan Biliga kuu yeelay
Ee dunida qayb idin baray, ayaad haatan baqastaan
Budh baa lala dhacaa Luuqadii baarqabka ahayd
Sedh-waay (ZY) inaad Bajaaj dhaafsataan waa bakhaylnimo
Waayadanba daartii Bush hows maaha baalaanis
Barnaamijka iyo wararkeedu geestaas bay u badan yihiine
Shaqaalaha Bidhaanbaa Taraxa, Dhaafay Boqolaal
Barqo-dharaga iyo Qaranimadda taala baladkeena
Badhaadhe iyo Amniga ka hirgalay iyo horumarkaa buuxa
Ee aan u baahnayn cid kale Boqorka mooyaane
Bilicdaadan ma arkaan Ilaah kuu balaysimaye
Waxay baadi doon ugu jiraan say u buriyaane
Waxaanay aad u buunbuuniyaan buuq-yar oo dhacay
Ballo laga ducaystiyo xumay naga dhex baadhaan
Beyshin bay dad hor Alle u fayow baratansiiyaan
Bayaan muuqda waxaa kala haboon been abuur shuba
Badheedh bay gef noogula kacdaa doqoni waa booshe
Baraad li’ida shicibkay arkeen aan baraarugin
Waxbase yuu Berberaduu ka furay Bilowgii Raadyowgan
Taariikh inoo soo bandhigin, Beerlaxawsiyahe,
Fm-taa bartaa inay dhigtaan baadilba ahayde
Baradaada TV ku lida boos kale u raadsha
Baaqiyo farriintaasi waa waxaan banaaneyne
Bulshayahay ayaanu idin hoddin biidhi qaatuhu.
Booraan yay idiin qarin dahsoon dar aad bah moodeen
Oo dayrtii hore laga bedalay Borogaraamkii
Nin libtaada inuu bi’iyo jecel tiisa ha u bilin
Berina waxaad isku canaanan layd maanta ha is badin.
Abwaan Cabdiraxmaan Cumar Cashuur waxaa uu maansadan curiyey oo ay soo baxday shalay oo taariikhdu ahayd 18-ka JULY ee sanadka 2017, oo ku beegnayd sanad guurada lixdanaad ee kasoo wareegtay markii la aasaasay laanta af soomaaliga ee BBC-da, 18-kii July 1957, taasi oo xaflad lagu xusayo ay BBC-du ku qabatay shalay Hargeysa.
