Hargeysa (Hubaal)- Maayarka degmada Balligubadle ee Gobalka HAWD Md. Cabdi Iimaan Jaamac (Guray), ayey soo gaadheen dhaawacyo culusi kadib markii weerar lagu qaaday waqti uu ku jiray shaqo waddo-bannayn ah shalay.
Maayarka Balligubadle ayaa la sheegay inuu dhaawacay nin shacab ah oo weerar gaadmo ah oo uu ku qaaday u adeegsaday budh wayn xilli masuuliyiinta dawladda hoose ee Balligubadle wadeen hawlgal ay ku banaynayeen waddooyinka magaaladaasi ku yaal.
Sida shabakadda Hadhwanaag baahisay, xubno qoyska Maayarka ka mid ah, ayaa xaqiijiyey in dhaawacyo culus ka gaadheen madax, kuwaas oo ku sababay inuu xaalad miyir la’aan ama koomo ah galo, waxaanna dhaawaciisa la keenay caasimadda Hargeysa, iyadoo la dhigay cusbitaalka Neerfayaasha ee Hargeisa Diagnostic Hospital oo lagula tacaalayo dhaawaciisa.
Warku waxa uu intaasi ku daray in ninka weerarka gaystay oo ka soo horjeeday waddo-bannaynta dawladda hoose ay soo qabteen ciidanka Itoobiya oo uu u baxsaday dhanka xadka dalkaasi ee magaalada Balligubadle, una soo gacangeliyeen ciidanka Booliska Somaliland.
