Madaxweynaha Ismaamulka Jigjiga Oo Maanta Qaabilaya Guddoomiye Cirro Iyo Weftigiisii Oo Ku Sugan Jigjiga

 Jigjiga (Hubaal)- Guddoomiyaha golaha Wakiillada ahna Guddoomiyaha xisbiga Mucaaridka ah ee WADDANI Cabdiraxmaan Maxamed Cabdillaahi Cirro ayaa shalay si ballaadhan loogu soo dhaweeyey magaalo madaxda ismaamulka Soomaalida Itoobiya ee Jigjiga, halkaasi oo uu ku qaabilay madaxweyne ku xigeenka dawlad deegaanka Soomaalida. Guddoomiye Cirro oo  uu weheliyo Axxmed Cumar Xaaji Cabdillaahi Xamarje oo ka tirsan Xisbiga WADDANI oo indhawaaleba safar ugu maqnaa dalkaasi Itoobiya oo uu kaga qayb galayay xuska qoomiyadaha ayaa shalay soo gaadhay killilka soomaalida ee dalkaasi, waxaana soo dhawayn heerkeedu sarreeyo ku qaabilay madaxweyne ku xigeenka DDS Mawliid Xayir ahna wasiirka waxbarashada, Madaxwayne kuXigenka Dowlad Degankaasi Cabdicasiis Maxamed Cabdi ahna Madaxa Xafiiska Xisbiga. Waxaana guddoomiyaha iyo weftigiisa la dejiyey aqalka Martida ee Jigjiga  halkaas oo uu degennaan doono inta uu socdaalka u jooga halkaasi.   Wararka laga helayo weftiga Guddoomiye Cirro, waxaa la filayaa in uu maanta la kulmo ama uu qasriga madaxtooyada magaalada Jigjiga Madaxweynaha DDS Md. Cabdi Maxamuud Cumar kaasi oo sida ballantu tahay ay ka wada hadli doonaan arrimo khuseeya siyaasadda labada dal.