Hargeysa (Hubaal)- Madaxweynaha Somaliland Md. Axmed Maxamed Maxamuud Siilaanyo ayaa warsaxaafadeed uu xalay kasoo saaray magaallada Hargeysa waxaa uu kaga hadlay xasuuqii ay dhawaan ciidammada Itoobiya ku dileen maatida ku dhaqan deegaanka hawdka sare ee dhulka Ismaamulka Soomaalida Itoobiya. Madaxweyne Siilaanyo waxaa uu dawladda Itoobiya ugu baaqay in ay wax ka qabato dilki shicibkaas oo badankoodu dhalasho ahaan Somaliland kasoo jeeda,. 
Warsaxaafadeedka madaxweynaha oo uu Afhayeenka Madaxtooyada Md. Cabdiraxmaan Sh. Cilmi Faahiye Shamax ku saxeexnaana waxaa uu u dhignaa sidan: “Madaxweynaha Jamhuuriyadda Somaliland, Mudane, Axmed Maxamed Silaanyo, Isagoo ku hadlaya magaciisa, ka Dawladda iyo kan shacbiga Somalilandba waxa uu dhammaal tacsi ah u dirayaa, dadkii isugu jiray waayeelka, caruurta iyo haween ee ku naf waayey dhiilladii, ka dhacday Jaamac Dubbad ee degmada Gaashaamo ee gobolka Jarar ee Dawlad deegaanka Soomaalida Itoobiya.
Madaxweynuhu waxa uu sheegay in uu aad uga damqaday dhibaatadaasi soo gaadhay dadkaasi shacabka ah, waxaanu ugu baaqay dadka deegaankaasi inay is dejiyaan oo aanay marnaba ku tallaabsan dhibaato dhibaato lagu saxo.
Sidoo kale Madaxweynuhu waxa uu u soo jeediyey dawladda Federaalka ee Itoobiya iyo dawlad deegaanka Soomaalida itoobiyaba, in shacbiga la ilaaliyo nabadgelyadooda, iyo hantidoodaba, isagoo dhinaca kalena ugu baaqay shacbiga deegaanadaasi inay ka danbeeyaan, lana shaqeeyaan dawladdooda, waxgaradka, iyo waayeelka deegaankaasina ay dawladdooda kala shaqeeyaan sidii xaalada loo dejin lahaa, amnigana loo sugu lahaa.
Madaxweynuhu waxa uu marxuumiintaa ALLE uga baryayaa inuu naxariistii janatu fardawsa ka waraabiyo Qoysaskii, Qaraabadii, Eheladii, Asxaabtii iyo Shacbigii ay ka baxeena samir iyo iimaan saadiqa ka siiyo.
IN-NAA LILLAAHI WA IN-NAA ILAYHI RAAJICUUN
Cabdiraxman Sh. Cilmi Faahiye (Shamax)
Af-hayeenka Madaxtooyada JSL.
