Hargeysa(Hubaal):-Xildhibaan Cabdiraxmaan Xoog oo ka mid ah mudanayaasha golaha wakiilada somaliland ee ka tirsan xisbiga mucaaridka ah ee Waddani ayaa si kulul uga hadlay arimaha doorashooyinka iyo mudo kordhinta la hadal hayo.
Xildhibaan Cabdiraxmaan Xoog oo maanta warbaahinta la hadlay ayaa waxa uu xukuumada ku eedeeyey inay doorashada la sugayo doorashada Xamar laga qabanayo laakiin waxaa uu tilmaanay inaanay taasi suura gal ahayn waxaanu yidhi “Dawladani waxay nala sugaysaa doorashada 2016-ka ka dhacaysa Xamar, dadkana waxay u cabudhinaysaa oo ay u cadaadinaysaa in dalka laga yaaco arinkaasina mid u suura galaya maaha, xukuumadu waa inay qabataa doorasho xiligeeda ku dhacda, waxaanay xukuumadani sharci tahay inta laga gaadhayo bisha lixaad ee sanadkan wixii intaas ka danbeeyana dawladu waa qayrul sharci ah.” Ayuu yidhi xildhibaan Xoog.
Sidoo kale xildhibaan Cabdiraxmaan Xoog waxa uu sheegay inay xildhibaanada mucaaridka ahi go,aan ka soo saari doonaan haddii xukuumadu doorashada wakhtigeeda ku qaban waydo waxaanu yidhi “Haddaanu nahay xildhibaanada labada xisbi mucaarid go,aan adag ayaanu ka soo saaraynaa haday doorashada wakhtigeeda ku qaban waydo, ma jirto wax kordhin la yidhaahdaa shuruudihii dastuurku sheegay ee kordhinta banaynayey wax dalka ka jiraa ma jiraan,Aafo baahsani ma jirto, Abaar baahsani ma jirto, somaliland nabad ayey ku naaloonaysaa sabab xukuumadu u cuskato kordhina ma jirto.”
Xildhibaan Cabdiraxmaan Xoog oo hadalkiisa sii wata ayaa sheegay inaanay madaxweynaha gacantiisa ku jirin talada dalku waxaanu yidhi “Madaxweynuhuna talada dalka imika wuxuunbaa loo akhriyaa oo loo qurxiyaaye dee odaygii ma joogo, arimihiisana nin ragi wuu ogyahay doqona loo sheegi maayo halka xaaladiisu marayso, in dad kale awoodisii ku tagri falaan oo ay u maamushaan kolbana ay madaxweynaha meeshii ay doonaan geeyaan oo kol ay yidhaahdaan sidii oday geelii ba’ay Awdal tag kolna Laascaanood ka soo jiiree adiga oo aan waxba qabanayn oo iska soconaya taasina dadka kalsoonidooda lagu kasban maayo.”
Ugu danbayntiina xildhibaan Cabdiraxmaan Xoog waxa uu sheegay inuu madaxweynaha somaliland diyaar u yahay inuu doorashada qabto balse ay dadka ku xeerani aanay ogolayn inay dalka doorasho ka dhacdo waxaanu yidhi “Madaxweynuhu sidii uu hore labada gole qaran uga hor cadeeyey ee uu yidhi maalin ku darsan maayo, madaxweynuhu doorasho wuu ogol yahay laakiin dadka ku xeeran ayaan doorasho doonayn dadka ku xeeran ayaa taladii ka haysta waana in talada madaxweynaha loo daayo, madaxweynahana tartan xalaal ah ayaanu la galaynaa oo cod ah madaxweynuhuna cod ayuu meesha ku yimid xabad kumuu qabsan, markaas waxaanu leenahay dawladu yaanay xukunka ku sii dhagnaan oo aanay xoog isticmaaline ha timaado, sidii lagu doortay ayaana lagu ridayaa waana dhab oo waa la ridayaa.” Ayuu xildhibaan Cabdiraxmaan Xoog hadalkiisa ku soo gaba gabeeyey.
