Muslimiinta Britain oo Muujiyey Takoor Diimeed oo lagu hayo & aragtidooda Aflagaaddeynta Nebi Muxamed (CSW)
London(Hubaal):- Aqlabiyadda Muslimiinta Britain waa ka soo horjeedaan in wax loo dhimo dadka daabaca Sawirrada lagu aflagaaddeeyo Nabadgelyo iyo Naxariisi Korkiisa ha ahaatee Nebigeenna Suubban ee Muxamed (CSW), sida ay muujineyso Cod-bixin laga uruuriyay Muslimiinta ku dhaqan Waddanka Britain oo lagu cabbiray Ra’yigooda oo BBC-du ay sameysay.
Qiyaas ahaan kala Badh Muslimiinta dalka Britain ku dhaqan waxay qabaan in Diintooda lagu takooro. Waxa kale oo ay Daraasaddu muujisay in Muslimiinta Ingiriiska badankoodu ku waafaqsanayn kuwa doonaya in lala dagaallamo danaha waddamada Reer Galbeedka.
Hase-yeeshee, 27% -kiiba oo ka tirsan kunkii Muslimiinta Britain ah ee Daraasadda lagu sameeyey waxay sheegeen in ay dareensan yihiin sabibihii ka dambeeyey weerarradii magaalada Paris ee Caasimadda dalka Faransiiska ee lagu fuliyey Ninkii daabacay iyo xaruntii Wargeyskiisa ee uu ku daabacay Sawirrada lagu aflagaaddaynayo Nebi Muxamed Nabdgelyo iyo Naxariisi korkiisa ha ahaatee.
Waxaase 80% Muslimiinta Britain ku dhaqani sheegeen inay aad u dhibsadeen Sawirrada lagu magac-dilo ama lagu aflagaaddeeyo Nebi Muxamed ee lagu daabaco Warbaahinta Reer Galbeedkan ama reer Yurub.
Hase-yeeshee, Sheekh Maxamuud Axmed Dalmar oo ah Khabiir ku xeel-dheer arrimaha Muslimiinta iyo Diinta Islaamka, isla markaana deggan dalka Ingiriiska oo Laanta Afka Soomaaliga ee Idaacadda BBC-du galabta wax ka weydiisay sida uu u arko Daraasaddan iyo aragtida Muslimiinta Britain ay ku muujiyeen, ayaa sheegay in Britain yahay waddanka loogu tixgelinta badan yahay Muslimiinta marka loo eego waddamada Yurub ama Reer Galbeedka.
Sheekh Dalmar waxa uu sheegay in ay iska dhici karto marka dadku dhaqan ahaan iyo Diin ahaan kala duwan yahay, in wax badan lagu kala duwanaan karo oo qolo weliba dhinaceeda ad-adayg muujin karto, hase-yeeshee, waddanka Ingiriisku yahay mid ka dhadhaw dalal badan oo la mid ah oo Muslimiin badani ku nool yihiin oo kuwa reer Galbeedka ka mid ah oo culays iyo cadaadisyo badan oo Diimeed ay kala kulmaan Muslimiintu.
Xigasho BBCSomali.com
