Cabdiraxmaan-cirro Oo ka hadlay Rajada iyo kalsoonida uu ku qabo In Madaxweyne Muuse Biixi Doorashada Ku Qaban doono Wakhtigeeda
Hargeysa (Hubaal) Musharrax madaxweyne ee xisbiga WADDANI, mudane Cabdiraxmaan Maxamed Cabdillaahi Cirro, ayaa sheegay inuu rajo weyn ka qabo in doorashada madaxtooyada ku qabsoomi doonto wakhtigii loogu talogalay, isla markaana uu kalsooni sare ku qabo madaxweyne Muuse Biixi oo uu ku tilmaamay masuulka ku suntan doorashooyinkii isku sidkanaa ee dalka ka qabsoomay 31-kii may ee sanadkan. Cabdiraxmaan-cirro oo safar ku maraya dalalka Yurub ayaa sheegay in saddexda xisbi Qaran, ay si wada jir ah ula kulmeen guddida doorashooyinka Qaranka Somaliland, waxaanu xusay in koomishanku masuuliyiinta saddexda xisbi u sheegay in ay madaxweynaha u gudbiyeen miisaaniyaddii iyo jadwalkii doorashadu ku qabsoomaysay madaxweynahana ay la ballansan yihiin.
Musharax Cabdiraxmaan Cirro ayaa sidan ka sheegay khudbad u jeedinayay taageerayaasha Xisbiga WADDANI ee dalka Sweden. Waxaanu yidhi.“Waxa hadda loo hadhuub qaadanaya doorashada madaxtooyada oo xilligeedii ku dhacaysa haddii ILLAAHEY yidhaaho. Intii aanan soo bixin saddexda Xisbi Qaran si wada jir ah ayay ula kulmeen Komishanka Doorashooyinka 18 November, Komishanku waxay noo sheegeen in ay Madaxweynaha u gudbiyeen miisaaniyaddii iyo jadwalkii doorashadu ku qabsoomaysay madaxweynahana ay la ballansan yihiin, intaa dalka waan ka soo maqna ee waxaan filaya in arrintaasi dhammaatay. Doorashadii hore ee wakiillada iyo deegaannada magac wanaagsan baynu ka helnay haddii aynu Somaliland nahay oo waxaa joogay masuuliyiin badan oo safiirro u badan, waxay noqotay in lagu tilmaamo doorashadii ugu fiicnayd Geeska Afrika haddiiba aanay noqon Afrika oo dhan.
Magacii ugu weynaana kolba ninka madaxda ah baa qaata oo Muuse Biixi baa qaatay magacii ugu weyna waxaanan filaya in uu tanna (Doorashada Madaxtooyada) magaceeda qaadan doono xilligeediina ku qaban doono Insha Allah,” ayuu yidhi Musharrax madaxweyne ee xisbiga WADDANI, mudane Cabdiraxmaan Maxamed Cabdillaahi Cirro,
