Hargeysa(Hubaal)- Odoyaasha iyo Madax dhaqameedka Deegaanka Koonfureed ee madaarka caasimada Hargeysa, oo shalay iskugu yimid shir ay kaga arrinsanayeen cida ay maamul ahaan hoos tagayaan degmooyinka Hargeysa iyo Salaxlay, ayaa soo saaray go’aan ah inay si toos ah u hoos tagayaan maamulka degmadda Hargeysa .
Shirkan oo ay iskugu yimaadeen odayaasha, waxgaradka iyo caaqiladda deegaanka koonfurta madaarka Hargeysa oo shirka ku qabsaday deegaanka Ubaalle ayaa sheegay in khilaafka caasimadda iyo degmadda Sallaxley isku hayaan deegaankoodda cidda maamulaysa ay ku keentay dib u dhac badan, isla markaana murankaasi sababay in deegaanadoodda wax mashruuc ah laga fulin, waxaanay Dawladda hoose ee Hargeysa ka codsadeen inay deegaankani u baahan yahay in wax loo qabto, sharciyana ay hoos yimaadan dawladda hoose ee Hargeysa.
Odayaashan ayaa sheegay in marka dhulkan la isku qabsado ay adagtahay in Sallaxley tagaan maadaama oo ay aad uga fogtahay, halka Hargeysana qofka lugaynayaa u socdo saacadd, sidaa darteed aanay dantooddu ku jirin degmadda Sallaxley.
Sidoo kale, waxay sheegeen inay waligoodba hoos tagi jireen maamulka caasimada Hargeysa, waxaanay dawlada hoose ee caasimada Hargeysa ka codsadeen inay deegaankooda ka hir geliso mashaariic horu marineed sida dugsiyada waxbarashada iyo goobaha caafimaadka.
Odoyaashan oo markii kulankoodu dhamaaday la hadlay warbaahinta ayaa shaaca ka qaaday inay doonayan inay maaamul ahaan hoos tagaan degmada Hargeysa oo ay sheegeen inay u dhaw dahay isla markaana ay ka helayaan adeegyada ay u baahan yihiin.
Caaqil Maxamed Weere Cismaan oo ka mid ah cuqaasha shirka iskugu timid ayaa ka hadlay go,aanka ay gaadheen waxaanu sheegay inay maamul ahaan raaceen caasimada Hargeysa isaga oo arimahaas ka hadlayana waxa uu yidhi “Haddii aanu nahay cuqaasha waxaanu nahay hay’ad nabad galyo, beeshan aanu cuqaasha nahayna waa beel taalay deegaanka mudo badan dawlado badana way ku soo mareen, waligeedna waxa laga xukumi jiray caasimada Hargeysa, waxaanay lahayd xad u gaar ah waxaana u xad ahayd meesha la yidhaahdo mitirka, wax murmaya iyo cid is haysata midna muu jiri jirin, dadka deegaankan degana wax loo qabtay may jirin, dhibaatooyin badana way haystaan, dadka deegaanka dagana waligood waxa laga xukumi jiray Hargeysa bari dhawayd ayuunbaa la yidhi salaxlay ayaa laydinka xukumaa, shirka ujeedada aanu u qabanayna waxa weeyaan in dadka deegaankan lagu soo celiyo meesha laga xukumi jiray, waxna loo qabto oo mashaariic badan laga hir galiyo.” Ayuu yidhi Caaqil Maxamed Weere Cismaan
Sidoo Cumar Biixi oo ka mid ahaa odayaasha deegaanka ayaa yidhi “ waxa isku kaaya haystay maamulada Hargeysa iyo Salaxlay dhibaatooyin badan oo dhaqaale burbur iyo rabshad keenay oo dhamaan waayey darteed waxaanu go,aansanay inaanu raacno caasimada Hargeysa iyada oo aanay labada maamul midna waxba noo qaban oo aanu godoon nahay, Salaxlayna way naga fogtahay oo haddii aanu wax isku qabsano dacwadayadu ma tagi karto 50km, sidaas darteed markii aanu tashanay waxaanu go,aansanay inaan laysku kaaya haysan ee aanu raacno caasimada Hargeysa oo in ka badn qarni ka tirsanayn, waxaana dadkani ka kooban yihiin Toon iyo Hargeysa inta u dhexeysa ee kala ah Gallooley, Ugaase, Ubaalle iyo Jabaate illaa Samalaha ee koonfurta madaarka Hargeysa”
Sidoo kale waxa ka hadlay Caaqil Cabdiqaadir Jaamac Cawaale sheegay intii uu Maayar Soltelko xilka la wareegay aanay jirin wax dhibaato ah oo guud ahaan caasimadda ka dhacday iyo cid isku qabsatay arrimo dhul oo geeri sababay, sidaa darteed waxay odayaasha deegaankani isla garteen inay ka hadlaan halka ay dantooddu ku jirto, waxaanu yidhi “dadka deegaankan daga oo meelo kala duwan ka yimid anaguna aanu caaqilo u nahay ayaa noo yeedhay, wixii ay noogu yeedheena iyaga ayaa ka cawday, nabad galyaduna inaguma noola ee inaga ayaa ku nool, nabad galyada in la ilaaliyo oo aanay cidina cid dhib u gaysan ayaa qurux badan, dadkuna wax badan ayey u baahan yihiin oo wax mashaariic ah oo loo qabto may jirin, waxaanu leenahay qorshaha caasimadu afarta dhinacba magaaladu wuu u socdaa, meesha uu horumarku u sii socdo ayaanu la jaan qaadaynaa.”
Sidoo kale, waxay ka cawdeen jidkii ay usoo mari lahaayeen caasimadda oo ay sheegeen in lagu xidhay Taar dheer oo madaarka lagu soo wareejiyey taas oo xoolihii iyo dadkii magaaladda imanayey aanay haysan meel ay soo maraan.
Si kastaba ha ahaatee, intii shirkaasi socday waxa goobta yimid maayarka Sallexley iyo Xildhibaano ka tirsan deegaanka Sallaxley oo isku dayey inay baajiyaan shirkaasi, haseyeeshee waxa ganafka ku dhuftay odayaasha deegaanka waxaanay sheegeen in aan dushooda la isku qabsan Karin, isla markaana ay cadaynayaan inay maamul ahaan hoos imanayaan dawladda hoose ee Hargeysa.
