“Maan Sheegin Anigu Inaan Isticmaalayo Hub, Taangiyo Ama Dalka Dagaal Galinayo”
Hargeysa (Hubaal) Wasiirkii hore ee Wasaaradda Maaliyadda Somaliland ahna Musharax u tartamaya madaxtinimada xisbiga KULMIYE, ayaa ka hadlay hadal dhawaan ka soo yeedhay oo uu sheegay in si khaldan loo turjuntay,waxaanu tilmaamay inaanu ahayn shaqsi looga boqo nabadgalyada iyo xasiloonada dalka.
Cabdicasiis Maxamed Samaale oo shir jaraa’id oo uu arintaasi kaga hadlay ku qabtay magaalada Hargeysa, waxa uu yidhi “Waxaan Jeclaystay Inaan dhawr Kalmadood oo kooban Ka Idhaahdo hadalkaygii ugu dambeeyay ee aan maalin dhawayd siiyay Warbaahinta,Hadal dhinacyo badan taabanayay ayuu ahaa,Waayaha Xisbiga Kulmiye ka waramayay,xiligii xisbiga la Aasaasay ,dadkii aasaasay oo aan ka mid ahaa,Duruufaha Kala Duwan ee uu Xisbigu soo maray iyo maanta halka uu taagan yahay,Tabashooyin ayaa Xaqiiqatan ku jiray aan runtii dareemayay in dad badani ay tabanayaan,oo Xisbiga ka mid ahaa oo Aasaasayaashii ka mid ahaa,oo Xukuumadda ka mid ahaa,hadalkaasi aan idhi waxaa laga soo dhex saaray qayb ka mid ah oo dadku u fasireen,hadal aad si u tidhi ayaa macnihiisa laga yaabaa in si kale loo fasiro,waliba dadka aad siyaasada ku kala duwan tihiin,sida uu markaa doonayo ayuu u qaadayaa oo sidaasi ayuu u jeeday ayaa la odhanayaa,waxaa ka mid ahaa Hadalkaasi,Haddii Shaanidii ku cabsi galisay tu ka wayn ayaa iman doonta,Haddii Xorriyadda Iyo Dimuqraadiyada la ilaalin waayo. “ ayuu yidhi musharrax Samaale
Isaga oo hadalkiisa sii watay, waxa uu yidhi “Maan sheegin inaan anigu isticmaalayo Hub,Taangiyo ama dalka dagaal galinayo,Xashaa lilaah,Anigu nin diinta wax ka yaqaan ayaan ahay,Illaahayna waxaan ka baryayaa diintaasi aan wax ka aqoono dadka ku dhaqma inaan ka mid noqdo,Umadda Somaliland Magacweyn iyo maamuus weyn ayaan ku dhex leeyahay,oo iyagu waliba i huwiyeen,oo inaan ilaaliyo u baahan,oo waxaan ka mid ahaa dadkii ay doorteen ee ay codka siiyeen Doorashadii Golaha Wakiilada ee 2005,Xubnihii Codadka ugu badan Gobolka Maroodi jeex ka helay ayaan ka mid ahaa,waan uga mahadnaqay umadayda,Mar kalena waan uga mahadnaqayaa,waaanan runtii ku bogaadinayaa,gudoomiye ku xigeenkii Golaha wakiilada ayaan mudo ahaa,dabadeedtana xilkii kale ee Madaxweynuhu ii igmaday ee Wasaarada Maaliyadda ayaan mudo hayay,isagana si sharaf iyo karaame leh ayaan uga tagay.” Ayuu yidhi Mr. Samaale
Waxaanu intaas ku daray “Intaa iyo intii ka horaysay iyo intii Dambaysayba Umada Somaliland waxaan qabaa aqoon in igu filan inay ii leedahay,inaanan ahayn shaqsi dagaal,Inaanan ahayn Askari,inaanan ahayn qof umadan looga boqi karo nabadgalyadeeda iyo xasiloonideeda. Hadalkaasi waxaa loo fasiray inaan dagaalamayo,xaasha eh,Anigu Askari ma ihi,Hub mahaysto,Waligayna Hub maan qaadan,intii aan xilka dawlada hayay,xitaa haddii ay dawladu Booli gaadh isiiso imay raaci jirin Boodhi gaadhku,Godob dalkani kuma lihi umana baahni cid shacbigayga iyo umadayda iga ilaalisa,Kalsooni ayaan xaqiiqatan ku qabaa,Asxaabtayda,Umadayda,Taageerayaashayda siyaasada,Qarankayga iyo Umadda reer Somaliland,waxaan ka raaligalinayaa sida Qaldan ee loo tarjumay ama loo fasiray hadalkaasi,waxaan u arkaa in dad ujeedo Gurucan lihi si qaldan ay u turjumeen”.
Cabdicasiis Maxamed Samaale waxa kale oo uu sheegay “Waxaan ka hadlay RRU oo ciidanka gaarka ah ee ay dawladu leedahay ah,Ixtiraam weyn ayaan RRU-da u hayaa runtii,Xukuumaddaan ka mid ahaa,Dalka way ilaaliyaan wanaag ayay u qabtaan laakiin mararka qaarkood ayaa si qaldan loo adeegsan karaa,markaan ka hadlayay RRr-da sababta aan u soo qaatay waxay ahayd,waxaad ogaydeen 17-kii Bishan Tobnaad 2015-ka,oo maalin sabti ah ahayd in Ciidanka RRU-da loo adeegsaday Munaasibad Qado Sharaf ah oo aanu ku samaynay Huteelka Maansoor saddexdayadii Murashax,in Qadadaasi la joojiyay oo RRU loo adeegsaday,Buuqii ka dhashay ayaad ogaydeen, in markii dambe Huteelka Guuleed aan u soo wareejinay ayaad ogaydeen,oo Guuleedna la isku dayay in isla RRU-dii lagu joojiyo ayaad ogaydeen oo aad Goob joog u ahaydeen,Munaasibadaasi Qado Sharafta ahayd waxaa joogay Madaxdii Qaranka,waxay ahayd Qado ay dawladu ku dhamayd ama inteeda badani ay joogtay,waxaa joogay Labada Gudoomiye ku xigeen ee Wakiilada,Waxaa joogay laba Gudoomiye ku xigeen oo Kulmiye ka tirsan,waxaa joogay Saddex Musharax Madaxweyne oo Xisbiga Kulmiye ah,waxa joogay ku dhawaad saddex Musharax Madaxweyne ku xigeen,waxaa joogay Xubin u sharaxnayd Gudoomiyaha Golaha dhexe ee Kulmiye,waxaa joogay Aqlabiyada Golaha Dhexe iyo Gudida fulinta Kulmiye.” Ayuu yidhi Cabdicasiis Samaale
