Qabashada Aadan-sunne Ayaa Ka Dembeysay Hadal Uu Subaxdii Ciidda KaJeediyey Garoonka Hargeysa Stadium
Bilaysku Wuxuu Sheegay In Sh. Aadan Sunne Ka Badheedhay Taageeridda Wadaado Ciidanku Qabqabtay Iyaga Oo Tobabar Dab Rid Ah Ku Samaynayay Deeganka Uubaale
Hargeysa (Hubaal)- Saraakiisha Taliska ciidanka Booliska Somaliland, ayaa sheegay in ay qabten Sheekh Aadan Sune oo ka tirsan Culimada Somaliland Iyo Koox dhalinyaro ah oo hubaysan. Afhayeenka Booliska Somaliland Gaashanle Sare Faysal Xiis oo warbaahinta la hadlay, ayaa sheegay in kooxdaas ay maleegayeen falal amniga dalka. Sidoo kale wuxuu sheegay in tobabar dab rid ah ay ku samaynayeen deeganka Uubaale oo dhinaca koonfurta kaga beegan magaalada Hargeysa . Afhayeenka Booliska Somaliland Faysal Xiis, ayaa sidoo sheegay in ciidamada Boolisku habeen hore hawl gal ay sameeyeen ku soo qabteen Sheekh Aadan Sune oo ka mid ah culimada ugu caansan magaalada Hargeysa, wuxuuna ku tilmaamay qabashada Sheekh Aadan Sune in ay ka danbaysay markii sida uu sheegay Boolisku ka war heleen inuu ku hawlanyay falal khatar ku ah amniga Somaliland, Isla markaana taageero u muujiyey kooxda dablayda ah ee ciidamada Boolisku qabteen. Sidoo kale Afhayeenka, ayaa sheegay in markii la qabanayay Sheekh Aadan Sune uu kala hor yimi Booliska iska caabin xooggan, isagoo sida uu sheegay diyaarsaday dhalinyaro doonayay in ay difaacaan. Dadweynaha Magaalada Hargeysa, ayaa habeen hore qaarkood maqlayay sanqadha rasaasta oo dhawaaqeeda laga maqlayay xaaafada qaarkood, waxayna arrinta qabashada wadaadka iyo kooxda boolisku sheegeen in hawlgabkaa lagu qabteen noqotay ta ugu hadalhaynta badan goobaha ay bulshadu ku kulanto ee magaalada hargeysa.
Sidee Loo Qabtay Aadan-sunne?.
Waxaa habeen hore saacaddu markay ahayd 12:15 daqiiqo ay Ciidamada RRU-da xoog ku galeen guriga Sheekh Aadan Cabdi Warsame (Sune) oo ku yaalla degmada Axmed Dhagax ee magaalada Hargeysa halkaas oo Rasaas Xoogan laga Maqlayey Gudaha Caasimada Gaar ahaan Xaafadan uu Sheekhu Degan yahay oo Cabsi galisay Bulshada. Waxaana Ciidanka Ka horyimid Dhalinyaro Ka gadooday Xadhiga Sheekha. Arrinta Sababatay xadhiga Sheekh Aadan Sune Ayaa ka Danbaysay kadib Markii Ciidamada Booliska Somaliland Toddobaadkii hore magaalada Hargeysa ka fuliyeen hawlgalo ay ku xidheen dhallinyaro wadaado ah oo ciidanku ku eedeeyeen in ay qorshaynayeen falal liddi ku ah ammaanka guud ee qaranka Somaliland.
