Waxaa Curiyey Abwaan Cabdiraxmaan Cumar Cashuur (Baadi-doon), Waxaanu soo baxay August Horaanteedii 2017-ka
“Sad bursiimo qaar baa ku helay silican waayaha’e,
Inta saaruq kuu haad heshay iyo saxal shuraakoobay,
Suryadaad ka laabtaba badh baa soodh la yuurura’
Si ay Saamaha Uugala baxaan tan aan siniineynin”
“In dhaweydba soofaha ma marrn, Seeftii maansada’e
Sufurtaba kamaan tumin tixihii soodhaha lahaaye
Bulshadaan ku saydh-saydhi jiray Ararta suugaanta
Sanqadhaba xaggii aan u dayay uma senyaaleyne
Hadaan kala sarriigiyo ku badan suuqdi ku abwaanku
Oonay dhaqanka siiroo ka dhigin suqusha Faysbuugu
Oon lagu sayixin foolxumadda kama saqaafeene
Sidaas aawadeed bay iigu wacan inaan ka soomaaye
Caawana wax bay seleliyee sooh isma lahayne
Waxaan saniyay Ganayoow dhawaqa aan sarre u qaado
Sagsaaga iyo khiyaamada musuqa saasintiyo boobka
Sarmo badatay suuskiyo goflaha sibilka dhuun yeedhay
Ee bahal ba bahal ugu sanqaday jeebyaraha siriray
Uu sabar kastaba ugaga dhacay waranku seefaysku
Ee saxa jidhiidh laga helliyo saato la cadeeyay
Sibraar maydhanaan lagu shubtiyo sixi ka caydhoobay
Uu seyn-cadaa wuxuu yaqiin sabi ka ciideeyay
Salaankii xishoodkana Ilbixu nagala soo siibtay
Salsaluuqa foomkiyo anshaxa suuko iyo dhoore
Saqajaankan waxay kaga daydeen sayladaha kale’e
Iyaddoo safaariya macsida la isku sooryeeyay
Sodoh iyo gashaanti iyo carmali seenyo iyo doobab
Sawir qaawan daawuu ku dilay saamaleelkani
Waxaa saawir dhaayaha ka dhigay, Zuumta cawradda’e
Surwaalkaa ka dhacay wiilashuna waa sanboor dhaqane
Wadda hadalka Soomaaliday sinno wadaagaane
Soo qaadka taariikh mar hore lagugu suuldaaray
Wax baa si ah dadkuna kuma sablado inay su’aalaane
Saawa-saawahay moogyihiin ay ku sugan yiine
Seedaha wahaabiga ku jaray soo dhaweyn ma leh
Sumcad guurka iyo ceebta waa la isku saacidaye
Waxaa waa baryaba saaqan shalay, mid aan sumaysnayne
Mimbarkii sufahadaa dalkii saaran Caliyowe
Waa suuq madow cullimaddii saafiga ahayde
Sumad laawe lama qoonsadiyo sumal-xad reeraha’e
Salkaa tabiyay qararkaa guryaha gaadhay saqafkiiye
Sin-saarada caqiiqadada bidcada saadhiga u gelisay
Basaskaa caruurtay sideen waa salool yidhiye
Rasuulkeenii sida laga warshay ee dhigay saxeexaynku
Sankay nagu hayaan tobankii hadhay sharadu saacaha’e
Waa sababayntii dijaal duulkan siqayaaye
Waxaad sii jaleecdaaba waa siidhigoo dhaca’e,
Sareediyo wanaag wuu galbaday loo sid tiriyaaye
Seerma waydadaa gabashiday iyo dhibacan seerseeray
Ee saricii beeruhu u ba’ay suququlkaa rayska
Ee xoolihii u sunsumeen sadaqad loo diiday
Sad bursiimo qaar baa ku helay silican waayaha’e,
Inta saaruq kuu haad heshay iyo saxal shuraakoobay
Ama suus shacbiga daashatuu la sakaraadaayo
Abaaraha ta roobkaa u sikhiran, jira Sidiiqowe
Suryadaad ka laabtaba badh baa soodh la yuurura’e
Si ay Saamaha Uugala baxaan tan aan siniineynin
Sideetan iyo labadaa bulshada sudhani ay eeday
Wuxuu suuli kaga dhacay qasdigu subaxay doorteene,
Golayaashan soocee gagada sifirka qoys keenay
Ka soo rayn malaha jeer hadaan la iska salabayne
Ha yeeshee intay sidato weli qaar hore u sahayday
Ee ay sokeeye u taqaan tuug sibraha jaraya
Ee ay la wadda soogan yiin kaayagaan saxanta
Ee ay bulshada seegan tahay see inoo danadu
Sooladay ka lulatiyo iyagaa saymaha is baday’e
Saan-saanta way kala fog-yiin siinadii qaran’e
Kolba sagagar ha u soo gashaddo suudhadh baadida’e
Afartaa saliilyadda shacbiga gees kastaba seegay
Ee weli silsiladdii ku xidhan seelada qabiilka
Inta qodob saluugliyo intaan suuragal u muuqan
Si sareex ah dhaawaca qarsoon ma ugu sababeeyay
Sunbo fiiqan siisoo af leh iyo sabaraddii dhagaxa
Sadexdaa midkood iyo anoon duubihii sidanin
Salaxaan dhaqaaqaynin baan saar is leeyahay’e
Suxuladu waxay igu murxeen xaal an soconayn’e
Arrinkaygu waa saxare ban ah sarab ka raadcee’e
Sakatiga dar aan ilaba qabin aan la sara joogo
Ka soo yaaca bahalada waan ku sandulays nahay’e
Iyagoo sawaxankaba maqlayn salafka Tii aarka [TR]
Bal aan saalbo saalbo ugu rido goor la kala seexday
Seeri aynu wada yeelaniyo golaha ha u seexan
Saska inbaa dib ugu baxay shakiga saami qaybsiga’e
Oo aan sidaad u xalin layd weli la suurayn’e
Sicir-bararkan waagii baryaba kor u sabaynaaya
Een soo dabaal meesha ool sii hor deg mooyaan’e
Sarifkiyo maceeshadahan aan meel saldhiganaynin
Dadweynahan hunguri siibmay ee wada sinbiidhaha ah
Safraddiyo dhibkaa ganacsigee maxasta saameysay
Gawaadhidan sameecadaha leh ee siqaya laamayda
Farriintay sidaan iyo isma leh suu dadkii yahay’e
Saboolkaa miciin waayay bay food ka sugayaan’e
Siyaasiga kuraasida rabiyo qoladda sii joogtay
Mid yidhaa sabaankan ina helay sidan dadka u dhaama
Oo uu xil kaa saaran yahay ma arag saaxiibe
Garanna maayo saydh saydh ka ladan samafalkeeniiye
In base kay u seeraysan tahay wow sajalan yiiin’e
Suulkiyo fartaan kala lumayn safafka yoomkaas’e
Ha yeeshee si weyn waxow cabsi leh sooftiweeradda’e
Saabaankan iyo kii intarbiis qalabku waa saym
Codkan seefaradda shalayba, waa taad ku sigateene
Bari haduu sidiisii fad-liqo yayna kala saari
Sidaad u aaminteen hawshu waa ka sino weyntahaye
Sog-sogna lama dhex maro adigoo bacdaa ku sita kaydkiiye
Olow nooga sahal wixii ku dhacay sawjadii Kilinton!!
Rabi talada ha inoo sakhiro sida inoo roone
Toobada subxaanta iyo saligu yaanu idin seegin
Dhibtana ku sabra maalmaha siloon saaxigaa xiga’e
Afartaa annoo sagama badan kaala saayiraya
Sifaha iyo tusaalaha dhacdada yoomba kugu saabsan
Safad markaan ka boodaba mid baan kuu salaxayaaye
Inta aanan soo xidhin tixdaan siinka ka higgaadshay
Xaashida sabbaankiyo mar aan saawiga u eego
Wax baa salag leh solow iyo colaad soohdintii bariye
Dhibtu hadii la sahashaddana way soo noqnoqotaaye
Sareeyow dab kaa naga baqtii yaanu sii fidine
Isa saarka faallada hadaan sadar idiin raacsho
Kolba licib siqiir aan lahayn sal iyo raad toona
Waan ka sindhidhaa dhowr markay igu salaamaane
Waligaaba kaad sanifsantaad laxashka saartaane
Sugaal hadaad ka webiseen kumuu saamax yidhi malagu
Ama ay saxeex kala qorteen mowdka sacadow
Wuxuu saatiroo qudhi og yahay ha ii sarbeebina’e
Ruuxba saacadii loo qoruu uunka sugayaaye
Cidna sahadinta uguma timaad seefta geeriduye
Wedka wow siman yihiin kuwaad u sacabinaysaane
Imisaa sariir waadh la dhigay weli kiiyoo saarran
Boqolaal foyoobaa socdeen kiiyoo sidii uuna
Midowna anniga kaad la safan tay ha ii siyaakhadin’e
Safar looma diro Jiho hadii aan sad kaa xigin’e
Waxaad socod u qababaashataa goobta saydhka leh’e
Sidii uma hirgalo lagu balamay sowdka ololuhuye
Surmi iyo haraad bow hantiya sahan la’aan guur’e
Ha yeeshee sawaabkiyo runtaan kuu ahayn sarrin’e
Cidna kuma sasabo waxaan dan guud bido sidiiqow’e
Sida ila haboon dhufashadaan samayda raacshaaye
Sinaba uma aqbalo arragtidaa siiso laba shay’e
Allow sahal amuurta iyo ducadu iga sal weeyaane
Surta lagu gardaadshiyo ansaxana saadanbe aan dhowro”
