Daawo sawirrada: Shacbi-weynaha reer Hargeysa Oo Maanta Loo Furay Irridaha Aqalka Looga Taliyo JSL Iyo Wejiyo Faraxsan Oo Hor-fadhiistay Madaxweyne Siilaanyo
Hargeysa (Hubaal)- Shacbiweynaha reer Somaliland ee ku dhaqan caasimada Hargeysa ayaa Subaxnimadii Saaka markii laga soo dareeray Salaada Ciidal-fidriga waxaa loo Ballaqay Irridaha aqalka looga taliyo dalkani JSL ee Madaxtooyada halkaas oo si kal furan loogu fasaxay in intii suurto gal ah ay gudaha u soo galaan shacbigu farxadda ciidal fidriga awgeed, halkaas oo Madaxweynaha Somaliland Md. Axmed Maxamed Maxamuud Siilaanyo uu soo dhawayn iyo salaan gacan qaad ah ku qaabilay isaga oo mid mid u gacan qaaday dadweynihii nasiibka u yeeshay inay waqtigooda farxadda ciida ku qaataan Madaxtooyada.
Sida lagu sheegay war qoraal ah oo uu warbaahinta Soo gaadhsiiyey Afhayeenka Madaxtooyada Garyaqaan Cabdiraxmaan Sheekh Cilmi Faahiye (Shamax), Madaxweynaha Somaliland oo ay hareero fadhiyaan Madaxweyne ku xigeenkiisa iyo madaxda goleyaasha qaranka ayaa dadweynaha booqashada ku tegey Madaxtooyada ku qaabilay kal furnaan iyo qalbi faraxsan. Madaxweyne Siilaanyo ayaa isagu salaadiin ciida shacbiga kula tukaday Masjid Jaamaca Magaallada Hargeysa, halka uu ku xigeenkiisuna uu shacbiga kula tukaday geigida kubbeda cagta ee 31-ka MAY ee magaallada Hargeysa. Sidoo kale xubno kamid ah golaha wasiirrada ayaa madaxweynuhu faray in ay gobollada iyo degmooyinka dalka socdaallo ku tagaan dabayaaqadii bisha ramadaan si ay dadweynaha deegaannadaas ugala qayb galaan salaada ciidal fidriga iyo farxadda dabaal dega.
Warsaxaafadeedka afhayeenku soo saaray oo nuqul kid ahi soo gaadhay Wargeyska HUBAAL-na waxaa uu u dhignaa sidan:
“ Madaxweynaha Jamhuuriyadda Somaliland, Mudane Axmed Maxamed Silaanyo, ayaa saaka salaadda Ciidal Fidriga kaga qaybgalay masjid Jaamac Caasimada Hargeysa, halkaasoo ay ku soo xaadireen kumaan qof oo ku tukaday gudaha iyo dacallada masjidkaasi.
Salaadda oo uu tujiyey wasiirka wasaaradda Diinta iyo Awqaafta Sheekh Khaliil Cabdilaahi Axmed ayaa ka mid ahaa tiro wasiiro, wasiiro ku xigeeno, madaxda ciidamada kala duwan ee dalka, masuuliyiinta wasaaradda Madaxtooyada, oo ay la safnaayeen dadweyne tiro badani.
Imaamka ayaa salaadda takbiirta badan ee ciidda ka dib, halkaasi ka jeediyey khudbad uu ku faah-faahinayo munaasibada ciidal fidriga iyo sida Alle Subxaana wa-tacaala iyo Rasuulkiisu (NNKH) u maamuuseen. Waxa kaloo khadiibku ku dheeraaday sida loogu baahan yahay in la joogteeyo cibaadaysiga sidii la ahaa bishii barakaysnayd ee Ramadaan.
Madaxweynaha Jamhuuriyadda Somaliland, ayaa tukashada iyo khudbada raacday ka dib halkaasi ka jeediyey ereyo ku saabsan salaanta ciidda, fadliga ay leeyihiin maalmaha ciiddu, farxada ku dheehan iyo duco uu ugu rajeeyey ummadda islaamka wanaag iyo nabadqab.
Madaxweynaha waxa ka mid ahaa hadaladiisi “Ciid Mubaarak, Ciid Mubaarak, kullu-caam wa-antu bikhayr, Ilaahay sanadka sanadkiisa ha inagu gaadhsiiyo bash-bash, barwaaqo iyo nabad”. Waxan salaanta ciidal fidriga ku salaamayaa dadyawga islaamka guud ahaan iyo gaar ahaan shacbiga Somaliland, waxan leeyahay ku ciida farxad iyo rayn-rayn, ciidda ciideedana Ilaahay ha inagu gaadhsiiyo liibaan iyo wanaag.
Madaxweyne ku xigeenka Somaliland Mudane Cabdiraxmaan Cabdilaahi Ismaaciil (Saylici) oo ay weheliyaan masuuliyiin ka tirsan xukuumaddu ayaa waxay la tukadeen shacbigii ku sugnaa garoonka 31-MAY ee Caasimada Hargeysa.
Madaxweynaha Jamhuuriyadda Somaliland ayaa u kala diray gobolada iyo degmooyinka dalka, xubno ka mida golaha wasiirada, kuwaasoo iyaguna kala qaybgalay shacbiga salaadda ciidal Fidriga, hadalo ku saabsan munaasibada ciidda iyo siyaasada dalkana halkaa uga jeediyey dadweynaha.
Markii ay salaadda laga soo dareeray ayaa waxa shacbiga loo furay albaabada Madaxtooyada, halkaas oo shacbiga caasimada intooda badani ay soo gelayeen, kuna salaamayeen madaxweynaha Qaranka oo ay hareero fadhiyaan madaxweyne ku xigeenka, gudoomiyaha guurtida Somaliland, Madaxweyne ku xigeenkii hore ee Somaliland Mudane Axmed Yuusuf Yaasin iyo wasiirada Madaxtooyada, Diinta iyo Awqaafta iyo masuuliyiin kale.
ALLAA MAHAD LEH
Cabdiraxman Sh. Cilmi Fahiye (Shamax)
Af-hayeenka Madaxtooyada JSL.
