Madaxweyne Siilaanyo, Muuse Biixi Iyo Cabdiraxmaan-Cirro Oo Tacsi U Diray Marxuum X. Daahir Cilmi
Hargeysa (Hubaal)- Madaxweynaha Somaliland Md. Axmed Maxamed Maxamuud (Siilaanyo), iyo labada guddoomiye ee WADDANI iyo KULMIYE Cabdiraxmaan Maxamed Cabdillaahi [Cirro] iyo Muuse Biixi Cabdi ayaa siyaabo kala duwan uga hadlay shakhsiyadii alla ha u naxariistee marxuum Xaajid Daahir Cilmi Ducaale oo shalay lagu aasay Magaalada Boorama ee xarunta gobolka Awdal.
Madaxweyne Siilaanyo
Madaxweyne Siilaanyo ayaa waxa uu tacsi u diray guud ahaanba shacbiga Somaliland isaga oo ka tacsiyadaynaaya geerida ku timid Xaaji Daahir Cilmi Ducaale oo ahaa tiir ka mid ah tiirarka uu qarankani ku faani jiray, maanta [shalay] oo ay taariikhdu tahay 30-ka/08/2015 ku geeriyooday Magaalada Boorama.
Madaxweynuhu waxa uu marxuumka ku tilmaamay oday dalka iyo qaranka ku dhexleh taariikh iyo magac, kana mid ahaa odayaashii u horeeyey ee u guntaday sidii qaranka Somaliland dhidibada loogu taagi lahaa, isaga oo ka soo shaqeeyey shirarkii taariikhiga ahaa ee Somaliland ku muujisay gooni isu taageeda nabadayntii, iyo dib u dhiskii dalka. Sidoo kale waxa uu madaxweynuhu tacsi taa la mida u dirayaa, Ugaasyada, Boqorada, sulaadiinta, cuqaasha, waayeelka, waxgaradka, iyo Qoyskii, Eheladii, Qaraabadii, Asxaabtii iyo shacbiga Somaliland, ee uu ka baxay marxuumku. waxaanu madaxweynuhu marxuumka Alle uga baryayaa inuu naxariistii jannatu fardawsa ka waraabiyo, qaranka somaliland, Ugaasyada, Boqorada, sulaadiinta, cuqaasha, waayeelka, waxgaradka Qoyskii, Eheladii, Qaraabadii, Asxaabtii iyo shacbiga Somaliland ee uu ka baxayna Samir iyo iimaan saadiqa ka siiyo.
Guddoomiyaha KULMIYE
Anigoo ku hadlaya xilka Guddoomiyaha xisbiga KULMIYE Muuse Biixi Cabdi, ka hoggaanka xisbiga, Guddiga Fulinta, Golaha Dhexe iyo guud ahaan taageerayaasha xisbiga KULMIYE, waxaan ka tacsiyadaynayaa qoyska, qaraabada, asxaabta iyo shacabka reer Somaliland geerida ku timi Marxuum Xaaji Daahir Cilmi Ducaale oo ku geeriyooday magaalada Boorama shalay oo taariikhdu tahay 30/08/2015). Marxuum Xaaji Daahir Cilmi Ducaale wuxuu ahaa oday taariikh wanaagsan ku lahaa dalka tan iyo waqtigii Ingiriiskii, waxaannu ka mid ahaa xildhibaannadii Baarlamankii u Horreeyey ee Somaliland sannadkii 1960-kii. Waxa kaloo uu kaalin wayn ka soo qaatay nabadayntii beelaha Somaliland markii xorriyadeeda ay dib ula soo noqtay, isagoo door wayn ka soo ciyaaray xulustii xildhibaanada Golaha Guurtida Jamhuuriyadda Somaliland.
Ilaahay waxaan uga baryayaa inuu jannadii Fardowsa ka waraabiyo Marxuum Xaaji Daahir Cilmi, qoysaska, ehelada, qaraabada iyo guud ahaan shacabkana uu samir iyo iimaan innaga siiyo. Aamiin…. Aamiin…. Aamiin.
Guddoomiyaha WADDANI
Gudoomiyaha Golaha Wakiilada Somaliland Ahna Gudoomiyaha Xisbiga WADDANI Md. Cabdiraxmaan Maxamed Cabdilaahi (Cirro), wuxuu tacsi tiiraanyo leh u dirayaa , Boqorada, Ugaasyada, Saladiinta, Cuqaasha Iyo Bah-weynta Madax-dhaqameedka, ehelkii, qaraabadii, asxaabtii & dhamaan Shacab weynaha Reer Somaliland, isaga oo ka tacsiyadaynaaya geerida ku timi Alle ha u naxariistee Marxuum Oday Xaaji Daahir Cilmi Ducaale oo ku geeriyooday 30/08/2015 shalay Magaalada Boorama. Gudoomiyuhu wuxu Eebe uga baryay inuu jannadii fardowsa ka waraabiyo. Marxuum Xaaji Daahir Cilmi Ducaale, qoyskii iyo qarabadii & shacbka Reer Somaliland ee uu ka baxayna samir iyo iimaan ka siiyo.
