Gabaygan waxa curiyay Mujaahid Cali Cismaan Cabdi (Cali Xaraaro) oo kaga waramay xaalada dalka uu madaxweyne Siilaanyo hogaaminayo marayo islamarkaana tilmaamaya sida ay xukuumadiisu ugu foogan tahay boobka hantida ummada.
Mujaahid Cali Xaraaro waxa uu sidoo kale kaga hadlayaa gabaygiisan islmarkaana ku iftiimininayaa cida dalkan horumar u horseedi karaysa oo dalka ka maqan taas oo uu mujaahidku ku cabirayo in ilaa inta ay bulshadu fahmayso ama ay baraarugayso uu dalku sidaa ahaanayo.
Waxaana uu ku bilaabay mujaahid Cali Xaraaro gabaygiisa sidan:
Sudhatiyo surwaal gaabtay wataan
Hay sadqeeyeene, silsilada hay gaabiyeen suxulo weyntiiye
Sunta haygu mudo saqiif seefo loo tumay
Guulwade sawaabiyo, Siloon hay sudhnaadeene
Hadba haygu suuxeen sidii dumarka saarley
Suryada naloo galay,waa horey sahanka meersheene
Saxariirka rag badan bay ila qabao o sixirku haysaaye
Anagiyo reer Somaliland wey na sidataaye
Suugii Habaryoonis buu dul yaal,keebka loo sugaye
Samaroon sisaaradii ku timid,sigay ugaaskiiye
Ciidagale suldaaniyo ma jiro boqor wax sooraa
Arab waa tii salaad hore la galay sabab la’aaneede
Dhiigii sumsumay waad ogeyd siday ka yeeleene
Kulmiye six un buu u galay Sacad ragiisiiye
Wuxuu Muuse eersaday kursiga maalintuu sugaye
Iskadaa siyaasada dalkooy erey su’aalaane
Subeer Awal oo dhan baan Aadanow saxar la weydiin
Hartiga saa saa ka dhaba saaka Caliyoow ‘e
Sagaashan iyo kowdii ragii seeska kula taagay
Saxi meyso xaajada haddaad wax u sarbeebtaane
Saamigoodii maqnaa bay rabaan iney sexeexdaan
Haday wiil maqaarsaariyo iyo doonayaan lacag la sii siiyo
Xagaa iyo Soomaaliyaba waa ka buux saro la seexdaa
Afartaasi waa saxansaxadii Gaariye saadaalo iyo Qaasim Siinleeydii berigii wixii sababay weeyaane Afar kalena waxaan uga socdaa wey iga sixitaan.
Siiraanyo haddii kheyr lagu ogyahay waa la sugi laaye
Waxba kuma leh salaaniyo iyo wanaag duciyo sii dhowre
Sibiqbaa dalkaba looga baxay Cumar suldaanoowe
Sool iyo Sanaagiyo ilaa Saylac gudaheeda
Soomaalilaand oo idil ma jiro samo nin sheegtaa
Dhalinyarada saranseerku waa suuqa gaajada ‘e
Markii shaqo la siin waayay ayay socodka maaleene
Dalka waxay uga sii yaacayaan waxay saluugeene
Waxay sii sumsumayaan xagaa bariga Soodaan
Saxaaraha Galbeediyo baduu silic ku heystaa
Surmi bey u leedeen ragii seeskan dumin laaye
Saqda dhexe habeenkii waxaan selelo oon boodo
Hadba waxaan la soo toosayaa seedahay go’an
Waxa lagu saleeyaa murtida sebenkay joogtaaye
Samirkuna Farxaanoow wanaag iima soo sido
Waxaa dalkii loo salimay sixun u nooshiiye
Sayidiyo Dhuxulbaan ogaa siday ahaayeene
Sablaale nimankii ka yimi ayaa loo sad tiriyaa
Cukusiyo wax ka sii liita baa suudhadh loo tolaye
Markii habro Zaad le iyo socoto loo yeedhay
Ayay ragii calanka ila saari laa iyo soocankii tagay
Saraakiishaa cadhootee saajinada laga saraysiiyay
Waa siyaasadii ina Siyaad sawirka muuqdaa
Waxba yaan aniga lay kala sakhirin suniyo waabaye
Dawlad aan guul ka sugayaa ma jirto Ina Sanweynoowe
Saddaxdaa goliyo maamulkaagan ayaan suul ku godeyaa
Markii uu Sandheeroow sibraha udub u saaraayay
Sahankuu ka meersaday inaan hiil u soo socone
Sahal uma kala daadiyeen hadduu qabiil garabka siinlaa
Rag badan saleeluu la yahay sawdka baxayaaye
Beelahan la kala soocayaad sahashanaysaane
Dhiigbuu sidaa Xisbigan aad sagalka moodeen
Soomaalilaan jeeroo lahelo waxay saluugayso
Sacab timale weeyaan inaad samo ku waartaane
Gartu ina sanweynow ma aha waxaad sawasaweenayso
Seyladihii waataa la xidhay suuqna laga caagye
Cashuurahan sideed dhaafay ee marqudha saddex jibaarmaaya
Sarajooga waxa lagu boobayaa shicibkan saaran heegada ‘e
Sucuudigana kamay iman waxaa rag isasiiyeene
Saamigoodii baa lagu dhistaa sarahan dhaadheer
Iyagaa saqiirkeyga baday suurta gaajada ‘e
Faylsaloow Allaa saatiree dhimay saboolkii
Afartaasi waa saxansaxadii Gaariye,saadaale iyo Qaasim siinleeydii berigii wixii sababay weeyaane,Afar kalena waxaan uga socdaa way iga sixitaan
Nin xishoonayaa Saalaxow sidan ma yeeleene
Sodoh maryo furatay iyo sabiga ooyaaya
Saqbadhkaa guryaha loo dhacaa reer sagaal qadaye
Moorgan kuma samayn tuu ku falay shicibka Suudoowe
Ma sugaynin waligay ragbaa tii kasii dariye
Xirsi wuxuu sidiiqay sadkay siisay maamaduye
Sodogii sidii uu ku yidhi Baashe socod siiye
Saxaafadda waxaa loo xidhxidhay boogta yey sarin
Waagii sursuurtaan ka digay yay ku socotaaye
Salka waxay ku haysaa mar kale siiqyo foorara ‘e
Ninkii siyaasadaa saacidoow kuuma saamixin
Saacadii wareegtaa ragbay sumad u yeeshaaye
Maantana Samaalow waxa socota taariikh
Xiliguna sidaa kuma tagee subaxba waa cayne
Saadaaladaa lagu gartaa sabanka caalwaa
Saddex xiddiga fallag iyo xalaan mooradii sugaye
Suuradaa madoow ee dayaxa saaran baan garane
Saakana Siciidow wakhtigu saamaxaad ma leh
Waana layna kala soocayaa subaxan dheerayne
Siigadaa dhacaysaana ragbay sababi doontaaye
Ninkii Soomaalilaan doonayoow samirka maad dhawrtid
Mujaahid Cali Cismaan Cabdi (Cali Xaraaro)
