Imtixaankii Shahaadiga Ahaa Ee Dugsiyadda dhexe Sare & ee Somaliland Oo La Soo Gabogabeeyey
Hargeysa(Hubaal)-Waxa si nabadgelyo ah usoo dhammaaday imtixaanaadkii shahaadiga ahaa ee Dugsiyada Dhexe iyo Sare oo toddobaadkii ugu dambeeyey ka socday dalka. Wasaaradda Waxbarashada iyo Sayniska Somaliland ayaa munaasibad ay ku shaacinaysay gabagabada Imtixaanaadkaasi shahaadiga ah khamiistii ku qabatay magaalada Hargeysa, taasi oo uu Goob joog ka ahaa wasiirka Wasaaradda Waxbarashada iyo Sayniska Somaliland Md Cismaan Jaamac Aadan , Wasiir ku xigeenka Wasaaradda Waxbarashada iyo Sayniska Md Maxamed Daahir Axmed iyo Guddoomiyaha Xafiiska Imtixaanaadka Qaranka Somaliland Daa’uud Axmed Faarax. Ugu horeynay Guddoomiyaha Xafiiska Imtixaanaadka Qaranka Somaliland Daa’uud Axmed Faarax oo goobta ka hadlay ayaa sheegay in imtixaanaadkii Qaranku ay intoodii badnayd soo xeroodeen, berrina ay filayaan in intoodii ugu dambaysay ay soo xeroodaan.
Waxa isna goobtaasi ka hadlay Agaasimaha Barnaamijka Shaqo Qaran Maxamed Xuseen Mu’adinka oo Dhalinyaradii Barnaamijka Shaqo Qaran si weyn ugu amaanay doorkii wanaagsanaa ee ay ka qaateen ilaalintii Imtixaanaadkii Shahaadiga ahaa.
Wasiir ku xigeenka wasaaradda Waxbarashada iyo Sayniska Somaliland Md Maxamed Daahir Axmed ayaa isna u mahadceliyey cid kasta oo ka qayb qaadatay hirgelinta Imtixaanaadkaasi Shahaadiga ahaa ee Dugsiyada Dhexe iyo Sare ee Somaliland .
Wasiirka wasaaradda Waxbarashada iyo Sayniska Somaliland Mudane Cismaan Jaamac Aadan oo gebo gebadii halkaasi ka hadlay ayaa shaaciyey in lasoo gebo gebeeyey Imtixaanaadkaasi Shahaadiga ahaa, isaga oo bogaadiyey xafiiska Imtixaanaadka Qaranka Somaliland oo uu tilmaamay in ay Hawl weyni ka dhacday , sidoo kalena ay mudan yihiin amaan iyo abaal marin.
Geesta kale waxa si rasmi ah shalay oo jimce ahayd xarunta xafiiska imtixaanaadka qaranka ee Somaliland u soo wadagaadhay dhammaan sanaaduuqdii imtixaanka ee sool ilaa selel goobihii uu ka dhacay, waxaanay si nabadgalyo ah ugu soo xeroodeen xarunta.
