Hargeysa(Hubaal):-Suldaanka guud ee beelaha gobolada Hawd Iyo Hargeysa Suldaan Cumar Suldaan Maxamed Suldaan Faarax ayaa munaasibad casho sharafeed ah ku maamuusay xulka gobolka Awdal ee ku guulaystay koobkii gobolada somaliland.
Munaasibadan casho sharaftan ah oo ka qabsoontay Hotel Hadhwanaag ee magaalada Hargeysa ayaa waxa ka soo qayb galay maamulka gobolka Awdal, xubno ka tirsan xukuumada iyo marti sharaf kale.
Suldaanka Guud ee beelaha gobolada Hawd iyo Hargeysa Suldaan Cumar Suldaan Maxamed Suldaan Faarax oo ka hadlay munaasibadan ayaa ugu hambalyeeyey guud ahaan bahda ciyaaraha gobolka Awdal guusha ay ka gaadheen ciyaarihii gobolada somaliland waxaanu yidhi “marka hore aad ayaan idiinku hambalyeynayaa guulaha aad ka gaadheen ciyaarihii gobolada somaliland, runtii gobolka Awdal waa mid aanu wax badan wadaagno dhinac kasta oo ay tahay waxaanan ciyaartoyga guusha gaadhay u rajaynayaa mustaqbal fiican.”
Maxamuud Xuseen Xirsi oo ka mid ah marti sharaftii ka qayb galay munaasibadan oo isaguna hadal ka jeediyey ayaa si qoto dheer uga waramay xidhiidhka soo jireenka ee ka dhaxeeya dadweynaha gobolka Awdal iyo beesha uu ka soo jeeda suldaanka casuumada u fidiyey ciyaartoyga gobolka Awdal, waxaanu tilmaamay in xidhiidhkaas darteed loo maamuusay maamulka gobolka iyo ciyaartoyga Awdal ee guusha ka gaadhay ciyaarihii gobolada.
Maayarka magaalada Boorama…Maydhane oo ka hadlay munaasibadan casho sharafta ah ee suldaan Cumar Suldaan Maxamed u sameeyey ciyaartoyga xulka gobolka Awdal ayaa sheegay inay aad ugu mahad celinayaan suldaan Cumar waxaanu ka waramay xidhiidhka soo jireenka ah ee ka dhaxeeya gobolka Awdal iyo beelaha daga gobolada Hawd Iyo Hargeysa.
Badhasaabka gobolka Awdal Mustafe Shiine oo isaguna munaasibadan ka hadlay ayaa ka waramay dedaalkii dheeraa ee ay muujiyeen ciyaartoyga gobolka Awdal mudadii uu socday tartanka ciyaaraha goboladu, waxaanu sheegay inay uga mahad celinayaan suldaan Cumar sida uu u maamuusay ee uu sharafta ugu muujiyey ciyaartoyga gobolka Awdal ee ku guulaystay tartankii ciyaaraha gobolada somaliland.
Sidoo kale waxa munaasibadan ka hadlay agaasimaha ururka dawlada hoose Maxamed Cabdi Xuseen iyo isu duwaha wasaarada ciyaaraha ee gobolka Awdal Samaroon kuwaas oo ka mahad celiyey munaasibada maamuuska ah ee u sameeyey suldaanka guud ee beelaha gobolada Hawd iyo Hargeysa Suldaan Cumar Suldaaan Maxamede Suldaan Faarax.”
