Kooxda Kubbeda Cagta Ee Baraka Cons. Company Oo Ku Guuleysatay Tartankii Bisha Ramadaan Ee Lagu Xusayey Marxuum Weriye Maxamed Daa’uud
Hargeysa (Hubaal) – Kooxda ku ciyaarta magaca shirkadda Dhismaha ee Al Baraka Construction Company ayaa ku guuleysatay koobkii tartanka bisha Ramadaan ee garoonka Abu-Site Stadium, kaas oo lagu xusayey looguna Baroor-diiqayey Marxuum Maxamed Daa’uud. Kulanka kama dambeysta ee Finalka ayaa ay iskugu soo baxeen kooxaha Al Baraka Construction Company iyo Wasaaradda Maalyada, waxaana guushu ay 2-1 ku raacday kooxda Al Baraka Construction Company, sidaasna ku hanatay koobkii tartankaas.
Kulankan ay labadan kooxood iskaga hor-yimaadeen ayaa ku bilawday jawi degan oo labada kooxoodba garoonka la soo galeen ciyaartoydii ay bidayeen inay guul u soo hoyn doonaan, waxaana ciyaar qurux baddan oo ay soo ban-dhigeen qeybtii hore ee ciyaarta lagu kala nastay 1-0 ay hogaanka ku haysay kooxda Al Baraka Construction Company.
Qeybtii labaad ee ciyaarta ayaa markale xamaasadii ciyaartu cirka isku shareertay, waxaana labada kooxoodba ay garoonka la soo galeen dar-dar xoogan, waxaana goolkii barbar dhaca la yimid kooxda Wasaaradda Maaliyada, dedaal dheeriya kadib kooxda Al Baraka Construction Company ayaa ay u suurto-gashay dhammaadkii ciyaarta inay la timaado goolkoodii 2-aad ee ay guusha ku gaadheen, waxaana u dhalliyey Khaalid Jaran. Aakhirkiina waxay ciyaartii ku soo idlaatay 2-1 ay guushii ku raacday kooxda Al Baraka Construction Company, sidaasna ay ku hanatay koobkii tartanka bisha Ramadaan ee garoonka Abu-site ee lagu xusayey Marxuum Maxamed Daa’uud, waxaana koobkii la guddoonsiiyey kabtankii kooxda guuleysatay Mr. Cismaan Laba-qori. Mulkiilaha shirkadda Al Baraka Construction Company Eng. Cabdiraxmaan Axmed Faarax ayaa hambalyeeyay guusha ay ciyaartoydii ku ciyaaraysay magaca shirkadiisu ay soo hooyeen, waxaana uu hoosta ka xariiqay in ciyaaruhu ay u baahan yihiin in la dhiiri-geliyo, oo ganacsatadu dhallinyarada taageerto.
Tartankan bisha Ramadaan ee ka socday garoonkan ayaa ahaa mid ay u soo daawasho tagi jireen dadweyne aad u tiro baddan, waxaana tartankan loogu baroor-diiqayo Marxuum Maxamed Daa’uud oo shil baabuur ku geeriyooday Ramadaantii hore soo qaban-qaabiyey dhallinyaro ay asxaab ahaayeen, waxaana maal-gelisay wasaaradda Maaliyada Marwo Samsam Cabdi Aadan.
