– Guddoomiyaha UCID Eng. Feysal Cali Waraabe
Hargaysa (Hubaal): Guddoomiyaha xisbiga mucaaridka ah ee UCID Eng. Faysal Cali Waraabe, ayaa ugu baaqay in dagaalka ay joojiyaan laba beeleed oo walaalo ah oo dhawaan dagaal ku dhexmaray deegaaanka dharkeen geeyo oo ka tirsan gobalka sool. Faysal Cali Waraabe, oo shalay hadal ka jeediyay xaflad qalab ciyaareed lagu guddoon siinayay kooxaha ciyaaraha ee degmadda Sallaxley ayaa ku baaqay in la joojiyo shaqaaqadii ka dhacday degaanka Dharkayn-geenyo. Waxaanu nasiib darro ku tilmaamay in shaqaaqo ka dhacdo Somaliland oo ah meel nabad lagu majeerto. Guddoomiyaha UCID oo arrintaasi ka hadlayayna waxa uu yidhi 
“Waxaa jira dagaal beeleed ka dhacay degaanka Dharkayn-geenyo oo ka tirsan gobalka Sool, laba beelood ayaa halkaa isku dilay, ilaa 32 qof ayaanay iska dileen. Taasina waxay ku tusaysaa in aanay nabadi jirin, horumar-na aanu imanayn, markaa waxaan ugu baaqayaa in ay xabada joojiyaan.” Sidoo kale Faysal Cali Waraabe, ayaa ugu baaqay xukuumadda in loo gurmaddo dadkaasi walaalaha ah ee iska hor imaadku dhex maray. “Xukuumadda-na waxaan leeyahay waa in la kala dhexgalo oo loo gurmado, waayo waa dadkeenii, waa reer Somaliland, oo qof qudha ayaan isku nahay, garaadada reer Sool iyo kuwa reer Somaliland waa in ay u gurmadaan labadaa beelood ee dagaalku dhexmaray. Xukuumaddu-na way ku baxday oo si fiican ayay yeeshay, waana in dadka la kala qabto. Waana inagu fool-xumo in Somaliland oo ugu horaysay meelaha nabada ah Soomaalida in xabadi ka dhacdo” ayuu yidhi Faysal Cali Waraabe.
