Hargeisa (Hubaal) Waxaa booqasho shaqo ku yimid xarunta HIIRAAL Youth Center ee magaalada hargeysa, masuuliyiin ka kala socday hay’adaha Qaramada Midoobay ee qaybta dhallinyarada UNSOM iyo UNDP, sidoo kale waxaa ku wehelinayey booqashada madaxa dhallinyarada UNFPA xafiiskeeda Somaliland. Masuuliyiinta ayaa ugu horayn waxay kormeer iyo indha-indhayn ku soo mareen xarunta HIRAAL iyo qaybaha ay ka kooban tahay.
Agaasimaha Fulinta hay’adda SOHASCO ayaa waftiga warbixin ka siiyey adeegyada ay dhallinyarada u qabato xarunta Hiraal Youth Center iyo tababbarrada kala duwan ee xarunta ka socda iyo sidoo kale hawlaha uu ururka SOHASCO u qabto dhallinyarta iyo bulshadaba. sida oo kale, waxa uu agaasimuhu tibaaxay waxyaabaha u qorshaysan in ay xarunta ku soo kordhiyaan mustaqbalka.
Masuuliyiinta ayaa waxa soo dhaweeyeen hawlaha ka socda xarunta HIRAAL Youth Center iyo adeegyada ay dhallinyarada iyo bulshada kalaba u qabato, waxaana ay ballanqaadeen in ay si dhow ula shaqayn doonaan hay’adda SOHASCO iyo xarunta HIRAAL Youth Center; sannadka cusubna ay halkaasi hawlo shaqo ka bilaabi doonaan.
