Wasiirka Macdanta Oo Seedigii Qandaraas Ku Siiyey $2.5 Milyan Oo Lagu Wacyi-Galinayo Dadka Ku Nool Deegaanada Shidaalka Laga Baadhayo
Hargeysa,(Hubaal)-Wasiirka Macdanta Somaliland
Xuseen Cabdi Ducaale ayaa qandaraas ku siiyey nin seedi u ah oo la
yidhaahdo Siciid Xasan Sheekeeye mashruuc qiimihiisu yahay $2.5 Milyan
oo shirkadaha shidaal baadhistu ugu tala-galeen in lagu wacyi-galiyo
dadka ku nool deegaanadda ay ka hawl-galayaan.
Bishii September 2013-kii ayaa waxa dalka si lama filaan ah uga baxday
shirkadda Genel Energy oo ah shirkadaha heshiisyada shidaal baadhista
ah kula jira wasaaradda Macdanta ta ugu wayn ka dib markii ay isku
dhaceen hawl-wadeenadii shirkadaasi iyo dadkii ku noolaa deegaanka
Saraar ee ay wax ka baadhaysay.
Masuuliyada isku dhacan ayaa waxa dusha laga saaray wasiirka Macdanta
oo ahaa cidii u dhaxaysay shirkadda Genel iyo dadka deegaanka, iyadoo
wasiirka lagu eedeeyey inuu shirkadda Genel u fasaxay inay hawlaheeda
bilawdo tii-yoo aan wali la qancin xoolo-dhaqatada deegaanadaasi oo
iyagu qabay shaki iyo walaac ah in hawl-galkan shidaal-sahamintu uu
waxyeelo u geysankaro deegaanka sida dhirta, daaqa iyo biyaha ee ay
xoolaha ay dhaqdaan ku noolyihiin.
Waxyaabaha kale ee soo dedejiyey in dadkii deegaanka iyo Genel ay
madaxa isla galaan waxa ka mid ahaa wasaaradda Macdanta oo ka baaqatay
wacyi-galintii dadwaynaha ee ay iyada iyo shirkadu isku ogaayeen in la
fuliyo inta aan hawsha sahaminta la bilaabin iyo waliba wasiirka oo
dadkii deegaanka ka qadiyey fursadihii shaqo iyo qandaraasyadii ka soo
baxay mashruuca shidaal baadhista.
Sidoo kale shirkadda DNO ee laga leeyahay dalka Norway ayaa
todobaadkii hore ee bishan joojisay hawlihii shidaal-baadhista ee ay
ka waday dhulka u dhexeeya Ceel-afwayn iyo Xudun ka dib markii ay
dadka deegaanadaasi ay soo caydhiyeen.
Ururada iyo axsaabta siyaasada ee mucaaridka ayaa dhinacooda waxay ku
tilmaameen hawlaha shidaal-baadhista ee laga wado Somaliland qaar aan
sharciyad ku fadhiyin maadaama aan heshiisyadooda laga ansixin
Baarlamaanka dalka.
Hesheesyada shidaalka iyo macdan baadhista ayaa waxa si qarsoodi ah u
maamusha wasiirka Macdanta Xuseen Cabdi Ducaale kaas oo xildhibaan ka
tirsan golaha wakiiladu dhawaan ku tilmaamay inuu ka mid yahay
saddexda nin ee ugu wayn ee dalka dhacay.
