Xildhibaan Golaha Deegaanka Burco Ka Tirsan Oo Ku Dooday In Uu Somaliland Ku Dhiirigeliyey Ka Qayb-galka Tartan Ciyaareed Ay Ka Qayb-gelayaan Wadamada Aan La Aqoonsan
Hargeysa (Hubaal)- Xildhibaan Mubaarig Yuusuf Cilmi (Bidhi) oo ka mid ah xildhibaannada golaha deegaanka magaalada Burco ayaa sheegay in uu hormood ka ahaa in Somaliland ka qeyb gasho tartanka wadamada aan la aqoonsan oo dhawaan ka qabsoomi doona wadanka Abkhazia. Xildhibaan Mubaarig Bidhi oo shalay u waramayay telefishanka Somali-cable ayaa waxa uu tilmaamay in loo baahan yahay in la garab galo kooxda Somaliland ee ka qeyb galaysa tartanka dalalka aan la aqoonsanayn oo 31-ka bishan ka dhici doona wadanka Abkhazia. waxaana uu tilmaamay in uu ku faraxsan yahay madaama oo uu ku guulaystay juhdigiisii ahaa in koox Somaliland ka socotaa ka soo ciyaaraan tartamada caalamka. Xildhibaanka oo arrimahaasi ka hadlayayna waxa uu yidhi “Waxa xusid mudan koobkaa ka furmaya magaalada Abijaan oo ay ka qayb galaan wadamada aan la aqoonsan ee aan xubinnaha ka ahayn FIFA waxa aan ahaa cidii u olalaysay in Somaliland ka qayb gasho tartanka wadamada aan la aqoonsan kana mid noqoto, waxaanan ka qaybgalay sannadkii 2003-dii shirweynahoodii koowaad, shirkii labaadna waxa aan kaga qaybgalay 2005-tii magaalada London ayaan kaga qaybgalay, waxa ila socday labo xubnood oo igu wahelinayay, maalintaas ayaan halkaa ku bixiyay fiigii oo Somaliland ka mid noqotay urukaa oo ay ku biirtay.”. Mubaarik Yuusuf Cilmi Bidhi waxa kale oo uu intaasi ku daray “sidoo kalena waxa aan ahaa ninkii sameeyay loogada ay ku ciyaarayaan xulka Somaliland saddex iyo toban sano ka dib in hawshii aan bilaabay ay suurawdo aniga waxa ay ii tahay sharaf , waanan ku faraxsanahay guul ayay ii tahay in hawshii aan bilaabay in barri koox ka soco Somaliland ka qaybgalayaan tartanka ka furmaya dalka Abkhaasiya, waana labo iyo toban wadan oo Somaliland ka mid tahay. maalintaa lagu darayay tartanka Somaliland 2005-tii 35 dawladood ayay ahaayeen’’. Xildhibaanku waxa uu uga mahad naqay shirkada Dahab shiil iyo maayarka caasimada taageeradii ay ka gaysteen kooxdii kubada cagta Somaliland ee ka qaybgalay tartankii dalka Maroco lagu qabtay sanadkii 2006-kii, waxaanu yidhi “Wakhtigii aan ku jiray hawshan sannadkii 2006-dii bishii Octoobar ee aan doonayay in xul kubada cagta Somaliland ka socodaa ka qaybgalaan koobkii Maroko lagu qabanayay waxa qalabka iga caawiyay oo aan marnaba aanan ilaawayn shirkada ganacsiga ee Dahabshiil oo bixisay diraysyadii iyo loogadii aan ku dhajiyay iyagaa lacagta bixiyay , sanadkii hore wasiirkii hore ee wasaarada ciyaaraha Axmed Cabdi Kaahin ayaan ku wareejiyay alaabtaas oo aan 12 sano hayay. Waxa kale oo aan u mahad naqayaa maayarka caasimada Hargeisa oo isagu gacan dhaqaale ka gaystay oo aanay suura gasheen in ciyaar toygaasi ka qaybgalaan tartankaas aad ayaanan uga mahad naqayaa’’. Xildhibaanku waxa uu fariin iyo baaq u diray ururada qurbajooga Somaliland, waxaana uu yidhi “Waxa aan doonayaa in aan baaq u soo jeediyo ururada qurbo jaaga Somaliland ee ciyaaraha, haday tahay wasaarada ciyaaraha oo layidhi khilaaf ayaa ka dhex jira waxa aan leeyahay u midooba danta qaranka iyo sidii ciyaaruhu mid u noqon lahaayeen, wasaaradana waxa aan leeyahay soo dhaweeya cid kasta oo ka shaqaynaysa horumarka ciyaaraha.” Sidoo kale xildhibaan Bidhi waxa kale waxaana uu yidhi.Xoriyadaa iyo qarankaa aynu haysano oo ay bilaamatay 27-kii May oo urukii xaq u dirirka ahaa ee SNM ay soo galeen magaalada Burco, maalin Jimce ah oo ay ka soo wareegtay 22 sano, wakhtigaas oo aan ku sugnaa magaalada Burco oo aan ahaa ninkii calanka SNM saaray saldhiga dhexe ee Burco, ILAAHAY ha unaxariisto intii ku dhimatay inta nool maantana ee keentay xoriyada waan xusayaa ee halganka ka qaybgalay haday tahay madaxweynayaashii dalka soo maray iyo madaxweynaha talada haya oo hormood ka ahaa wakhtigaa, ahaana guddoomiyii SNM, kalmad dhaxal gala ayaana uu yidhi wakhtigii Itoobiya iyo Soomaliya heshiiyeen, oo yidhi ahad dawladahaasi heshiiyay wax ba nagama galin ee waa dagaalamaynaa,” ayuu.yidhi Xildhibaan Mubaarik Yuusuf Cilmi Bidhi.
