Xil. Xasan Cawaalle Oo Luuqad Kacaamaysan U Daliishaday Doorashooyinka Isa saarka Ah Iyo Cimri Dherer Loo Sameeyo Muddo Xileedka Madaxweynaha
“………..Qolooyinkii [Xukuumadihii Cigaal & Rayaale] Ka Horreeyey [Madaxweyne Siilaanyo], Waxay Hayn Jireen [Xukunka] Sideed Illaa Sagaal Sanno….[Immikana] Haddii Labada Doorasho Laysku Daro, Waxaa Dhacayaa Qas”
Hargeysa (Hubaal) Guddoomiyaha guddida arrimaha bulshada ee golaha wakiillada Somaliland Xildhibaan Xasan Cawaale Caynaan oo shalay warbaahinta kula hadlay magaallada Hargeysa ayaa ka hadlay ra’yigiisa ku aaddan doorashooyinka golaha wakiillada iyo madaxtooyadda ee sanadka soo socda la filayo inay dalka ka qabsoomaan. Xildhibaan Xasan Cawaale waxa uu soo jeediyay in labada doorasho ee madaxtooyadda iyo wakiillada la kala saaro, isla markaana doorashada wakiillada laga soo hormariyo madaxtooyadda. Xildhibaan Caynaan waxa uu ku dooday in muddo 2 sano ah loo kordhiyo madaxweynaha, taas bedelkeedana la kala qaado labada doorasho ee madaxtooyada iyo golaha wakiillada, “waxaan soo jeedinayaa fikirkayga ku aaddan labada doorasho la kala dambaysiiyo, sidaa daraadeed lasoo horeysiiyo doorashada baarlamaanka, isla markaana madaxweynaha loo kordhiyo laba sanadood.” Ayuu yidhi xildhibaan xasan Cawaale oo sidoo kale sheegay in xukuumadihii ka horeeyay xukuumadda haatan ay hayeen xukunka muddo ka badan inta madaxweyne Siilaanyo hayo, isagoona sheegay in qas imanayo haddii labada doorasho ee wakiillada iyo madaxtooyada la isa saaro ama mar lawada qabto “sababta aan u leeyahay midaasi waxay tahay, haddii labada doorasho laysku daro waxa dhacaya oo imanayo qas. Qolooyinkii ka horeeyay waxay ahaan jireen ilaa sagaal sano iyo siddeed sano iyo waxbay ahaan jireen, markaa waxaan leeyahay madaxweynaha haloo kordhiyo laba sano, oo ta baarlamaanka hala soo horeysiiyo.” Ayuu yidhi Xildhibaan Xasan Cawaale waxa Sidoo kale Xildhibaankani uu soo jeediyay in iyana 2 sano loogu daro oo loo kordhiyo golaha guurtida.
