Ardey dhigta Jaamacad oo u dhashay dalka Mareykanka ayaa saaxiibtiisii ku celiyay warqad raali gelin ah oo ay usoo dirtay ka dib markii uu u saxay sida mid imtaxaan. Ardeyga ayaa siiyay natiijo ka dib markii uu saxay qaladaadkii isaga uga muuqday warqadda. Wuxuu ardeygaasi sheegay inaanu ka xumeyn in warqadda ay baraha bulshada ku faaftay. Nick Lutz ayaa qalin casaan ah ku saxay warqadda oo ahayd raali gelin loosoo diray.
Wuxuu taxliilin ku sameeyay sida ay u qorneyd warqadda oo afar bog ahayd oo ay u soo dirtay gabar jecleyd.
Wuxuu BBC Newsbeat u sheegay: “Waxaan saaxiibo ahayn sideed bilood”. “Afar bilood ka dib waxay bilowday inay telefoonkeeda iga qariso. Waxaan maqlay inay rag kale saaxiib la ahayd,” ayuu yiri.
Nick oo dhigta jaamacadda Central Florida, wuxuu sheegay in warqadda lasoo gaadhsiiyay waxyar ka dib markii ay saaxiibtii isku dheceen.
Waatan warqadda uu Nick saxay
Sixitaanka wuxuu ku billaabay, “hordhaca wuu dheeryahay, waadna ku soo celcelisay”. Ardeyga oo 20-sano jir ah wuxuu doonayay in saaxiibtiisii hore ay sabab u yeesha sadarka ah: “Waxaad ku guuldareystay inaan ilaaliyo xireerkeena”. Wuxuu kale oo ku dul qoray warqadda inuu u baahan yahay inay cadeyso marka ay leedahay “weligey kuma khayaamin”. “Maalin ayey ii sheegtay inay gabadh u raaceyso dalxiis, balse wiil kale ayey raacday”, ayuu u sheegay BBC Newsbeat. “Lama hadlin tan iyo markii arrinta ay dhacday, mana qorsheynaayi inaan la hadlo”, ayuu yidhi.
Bogga labaad, wuxuu saaxiibtiisii hore ka codsaday inay faafaahiso sadarkan: “Waan ilaaliyay dhammaan ballanqaadyadii, waanna ka baxay”. Sidoo kale wuxuu u sheegay inay iska ilaaliso qaladaadka higaada xuruufta, sida ereyadan “loose” iyo “lose”. Nick ayaa saaxiibtii ka dalbaday inay cadeyso waxa ay ula jeedo “ma jirto sabab aan wax kaaga qariyo, ama been kugu sheego”.
Wuxuu dhinac kaga qoray: “Haddii aysan jirin sabab aad been u sheegto, maxaad runta u sheegi la’dahay?”
Warqadda uu saxay oo uu boggiisa Twitter-ka geliyay waxaa la wadaagay in ka badan 100 kun oo jeer.
“Ayada kuma faraxsana, anna ma fileyn inay heer intaa la eg gaarto warqadda. Hooyadey ayey la hadashay, aniguse lama hadlin, mana u maleynaayo in aan la hadli doono”, ayuu yidhi. Xittaa wuxuu u sheegay saaxiibtii in nooca farta qoraalka ee ay isticmaashay ay tahay mid isku dhex yaacsan.
Bogga ugu dambeeyay ee warqadda waxay gabadha ku dhameysay “wan ku jeclahay”, balse Nick calaamadda su’aasha ayuu saaray. “Haddii aad dooneyso in lagu aamino, cadeyn ku taageer sheegashadaada”, ayuu ugu qoray warqadda dusheeda markii uu saxaayay.
“Sheegasho khiyaanada ah weligeed ma dhicin, naftaada eedee, maxaa kale? ayuu u sheegay saaxiibtiisii hore.
“Sheekadaada way is burineysaa ee dhinac qaado. waxaan jeclahay faafaahin in laga bixiyo waxyaabaha la sheeganayo”.
