Xaabsade Oo Damaciisu Ka Dejiyey Xalay Garoowe+Khiyaamadii Qaran Ee Uu Hore Uga Toobbad Keenay Oo Uu Ku Beddeshay Mansab Looga Lullay Puntland+Naanays Maamulkaasi Ku Suntay Shakhsiyaddiisa Oo Dhab Noqotay
HUBAAL KA AKHRI: “…..Tallaabadan Uu Mansabka Ugu Doontay Garoowe Waxa Ay Ka Marag Furaysaa Naaneys Maamulka Puntland Hore Ku Tilmaamsan Jirey Guur-guurka Siyaasaddeed Ee Xaabsade Inuu Yahay Nin Aan Mawqif Lahayn Balse Iskaga Dab Qaada Hadba Halka Uu Damaca Xilka Uu Naawilayaa Ku Jiro”
**********
“Waa Markii 2aad Ee Xaabsade Ka Tago Somaliland, Isaga oo Sidan Oo Kale Uu Sanadkii 1997-kii Ka Cadhooday Mansab Uu Doonayay Oo Loo Dooran Waayay…….”
Garoowe (Hubaal)-La Taliyihii Madaxweynaha Somaliland ee arrimaha doorashooyinka Axmed Cabdi Xaabsadde, ayaa la soo weriyay inuu galabta galay xarunta maamul-goboleedka Puntland ee Garoowe, ka dib markii uu dib uga laabtay qaddiyadda gooni isku taaga Somaliland oo uu dhawrkii sanadood ee la soo dhaafay uu aaminsanaa.
Mr. Xaabsade ayaa la sheegay inuu galabta galay Garoowe, ka dib markii uu ka soo kicitimay magaaladda Jig-jiga ee dawlad-deegaanka Soomaalida Itoobiya, waxaana la sheegay in muddooyinkii u dambeeyay oo uu ku sugnaa magaaladda Jig-jiga ay u socdeen wada hadallo iyo cilaaqaad ku saabsan inuu Puntland ku biiro, ka dib markii uu ka biyo diiday dawladda Somaliland oo uu la Taliye Madaxweyne ka ahaa isla markaana uu ka soo qabtay xilalka Wasiirnimo oo kala ahaa Wasiirka Warfaafinta iyo Wasiirka Hawlaha Guud iyo Guriyaynta.
Mr. Axmed Cabdi Xaabsade ayaa ilo xog ogaal ahi weriyeen in maamulka Madaxweyne Cabdi-weli Gaas ee Puntland ay ka wada hadleen sidii loo magacaabi lahaa mansab Wasiirnimo.
Xaabsadde oo dhawaan siiyay waraysi qaar ka mid ah wargeysyadda ka soo baxa caasimadda Somaliland ee Hargeysa uu ku sheegay in uu isku qoomamaynayo talaabadii uu Somaliland kala shaqeeyay in magaaladda Laascaanood u soo gacan gasho Jamhuuriyadda Somaliland, waxaanu xukuumadda Madaxweyne Siilaanyo ku eedeeyay inaanay kala tashan arrimaha la xidhiidha Gobolka Sool.
Waa markii labaad ee Axmed Cabdi Xaabsade uu ka tago Somaliland, isagoo sannadkii 1997 ka tagay Somaliland ka dib markii loo dooran waayay jagada Guddoomiyaha Golaha Wakiiladda oo uu hayay sanadihii 1993-kii illaa 1996-kii.
Axmed Cabdi Xaabsade mudadii uu dhawrkii sanadood ee la soo dhaafay uu xilalka ka hayay Somaliland waxa uu eedaymo iyo hanjabaado kala duwan u jeedin jiray maamul goboleedka Puntland oo uu xiligaasi majaraha u hayay madaxweyne C/Raxmaan Faroolle.
Puntland ayaa xiligii C/Raxmaan Farroolle waxay ku naanaysi jireen Axmed Xaabsade nin u kala dab-qaada oo iskaga wareega maamuladda kala duwan, iyagoo uga jeeday hadalkaasi inuu yahay nin aan mowqif siyaasadeed lahayn ee saaxiib la ah kuraasida iyo xilalka dawladnimo ee uu markaas ka tirsan yahay.
Mr. Xaabsade ayaa la sheegay inuu galabta galay Garoowe, ka dib markii uu ka soo kicitimay magaaladda Jig-jiga ee dawlad-deegaanka Soomaalida Itoobiya, waxaana la sheegay in muddooyinkii u dambeeyay oo uu ku sugnaa magaaladda Jig-jiga ay u socdeen wada hadallo iyo cilaaqaad ku saabsan inuu Puntland ku biiro, ka dib markii uu ka biyo diiday dawladda Somaliland oo uu la Taliye Madaxweyne ka ahaa isla markaana uu ka soo qabtay xilalka Wasiirnimo oo kala ahaa Wasiirka Warfaafinta iyo Wasiirka Hawlaha Guud iyo Guriyaynta.
