Hargaysa (Hubaal)- Toddoba Xildhibaan oo ka tirsan Golaha Degaanka ee degmada Burco, ayaa waxba kama jiraan ku tilmaamay eedaymo xildhibaanno ka tirsan golaha degaanku u jeediyeen Wasiirka Hawlaha Guud, kuwaas oo ku eedeeyay inuu iibiyay suuq ganacsi oo ku yaalla magaladaas.
Xildhibaanadan oo shalay si wadajira warbaahinta kula hadlay magaalada Hargaysa ayaa sheegeen in suuqa gananacsi ee laga dhisayo magaalada Burco uu soo sharciyeeyay madaxweynaha Somaliland.
Waxa kaloo ay bayaamiyeen in aanay jirin suuq ganacsi oo uu iibiyay Wasiirka Hawlaha Guud Cali Xasan Maxamed (Cali Mareexaan).
Xildhibaan Mubaarig Yuusuf Cilmi Bidhi ayaa sheegay in guddoomiye Cirro ceeb ku tahay in uu ku soo dabafaylo xildhibaanno ay isku jufo yihiin, waxaanu yidhi “Waxa runtii ceeb ah nin kii madaxweynaha dalka ka doonayay in uu ku soo daba faylo xildhibaano reer kiisa ah uu yidhaahdo waxbaa la boobay,arintaasu waa arin fadeexad ah waxaana ay u muuqataa in aanu ahayn nin umaadu xil ay ku aamini karto xildhibaanadii laga soo doortay degmada Burco ayaa ilaashanaya moolkaas oo anaga ah waxa aan leeyahay ninka yidhi cagaf ayaan galinayaa waxa aan leeyahay waxa aad moodaysaa iskuul kii Womens clup ka.”
Waxa kaloo uu ku dooday in suuqan ganacsi ee lagu soo kordhiyay magaalada Burco uu yahay horumar magaalada usoo kordhay.waxaana uu yidhi “Guryahaa sidii lagu dhisay markaan ka hadlo saddex suuq ayuu soo sharciyeeyay madaxweynaha Somaliland in laga dhiso magaalada Burco in dad kaas bacadka fadhiya loo dhiso guryo ay ku ganacsadaan,horumar magaalada lagu soo kordhiyay ayay ahayd.”
Xildhibaan Maxamed Tuur-tuur ayaa beeniyay hadallo ka soo yeedhay xildhibaanadaas isla markaana ay ahayd arrin ay ugu olalaynayeen xisbiga Waddani, waxaanu yidhi; “Waxa xaqiiqada ka fog ayay ahayd oo ummaddu la yaabtay hadalka ka soo yeedhay xildhibaannada ka tirsan golaha degaanka ee Burco,ciddii xogogoolka u ahayd ee golaha degaanka ka wada tirsanaayeena way la yaabtay arrimahaa ay ku hadleen arrinkooduna waxa uu u muuqday arrin olale ah oo xisbiga Waddani ay ugu olalaynayeen.
Waxay ku olaleeyeen wax xaqiiqada ka fog ninkii guddoomiyaha ahaa ee waddanka oo dhan codka ka doonayay ayaa gidaarada jidh siiyeen ninkii madaxweynenimada doonayay MALL ayaa la iibiyay olale uma geli karto xaqiiqo waxaan ahayn ayay u sheegeen xildhibaanadani MALL kaasina sharci ayuu ahaa oo sidiisii ayuu ku socdaa wasiirka aad fadeexadayseena waa la idiinka fadhiyaa inaad ku soo caddaysaan eedaha aad u soo jeeediseen.”
Sidoo kale waxa iyaguna halkaasi ka hadlay Xildhibaannada kala ah Axmed Cabdi Dhimbiil, Khadar Nuux, Nuux Maxamed, Siciid Axmed iyo Gaboobe, waxaanay si adag u dureen xildhibaannada xajiimaynaya Wasiirka Hawlaha Guud.
