Hargeysa (Hubaal) Xukuumadda Somaliland ayaa sheegtay in ay ka xuntahay Go’aanka Soomaaliya Ka Qaadatay Danjire Nicholas Haysom, isla markaana aanu Somaliland khusaynin go’aankaasi. Sidaasna waxa lagu sheegay War qoraalka ah oo ka soo baxay wasaaradda arrimaha dibedda Somaliland ayaa u dhignaa sidan:
Dawlada Jamhuuriyada Somaliland waxay u cadaynasaa Xoghayaha Guud ee Qaramada Midoobay iyo Beesha Caalamka intaba in ay ka xuntahay go’aanka Soomaaliya ka qaadatay Wakiilka Xoghayaha Guud ee Qaramada Midoobay Mudane Nicholas Haysom.
Dawlada Jamhuuriyada Somaliland iyadoo tixgelinaysa iskaashiga iyo taageerada dhanka horumarka iyo bani’aadamnimada ee ka dhaxeeya Somaliland iyo Jimciyada Quruumaha ka dhaxaysa waxay ku war-galinaysaa Xoghayaha Guud ee Qaramada Midoobay in go’aankaasi aanu khusayn Somaliland, isla markaana ay dawladda Somaliland si buuxda ula shaqaynayso Jimciyada quruumaha ka dhexaysa iyo laamaheeda kala duwan.
Dawlada Somaliland waxay ku bogaadinaysaa Wakiilka Xoghayaha Guud ee Qaramada Midoobay Mudane Nicholas Hayson in uu mudadii uu joogay xafiiska uu dedaal xoog leh u galay nabadaynta Soomaaliya dhexdeeda iyo xal-uraadinta khilaafka Somaliland iyo Soomaaliya.
Ugu dambayn, dawladda Jamhuuriyadda Somaliland waxay aaminsantahay in go’aankan ka dhanka ah Wakiilka Xoghayaha Guud ee Qaramada Midoobay uu ka xeel dheer yahay waxa lagu sababeeyay, isla markaana uu ka dhalan karo cawaaqib xumo mustaqbalka.
War-saxaafadeedka Wasaaradda Arrimaha Dibedda Somaliland
