Gudoomiyaha golaha dhexe ee KULMIYE Garyaqaan Jaamac Ismaaciil Cige (Shabeel)
Hargaysa (Hubaal) – Gudoomiyaha golaha dhexe ee xisbiga talada dalka haya ee KULMIYE Jaamac Ismaaciil Cige [Jaamac Shabeel ] ayaa waxba kama jiraan ku tilmaamay eedo uu u jeediyay Xuseen Axmed Caydiid oo ka mida siyaasiyiinta xisbiga mucaaridka ah ee Waddani. Guddoomiye Jaamac Shabeel oo magaallada Hargeysa kula hadlay Telefishanka SAAB ayaa nasiib darro ku tilmaamay in wasiirkii hore ee caddaalladdu Xuseen Axmed Caydiid Ay kasoo yeedhaan hadallo laaqi ah oo aan ka turjumayn garaadka siyaasiga ah ee xisbiga uu xubinta haatan ka yahay ee WADDANI.
“Xuseen Axmed Caydiid Intuu garoon Cidlo ah dhex tegey ayuu ka tororog leeyey”, sidaas ayuu Md. Jaamac Shabeel yidhi, waxana uu intaas ku daray “Annagu KULMIYE haddaanu nahay siyaasadda aanu [tartannada ciyaaraha ] ka lahayn waxay ahayd in dhalinyaradu ay jecel yihiin inay bisha ramadaan tartanno galaan waa arrin ka dhigan sida liigagan ciyaaraha ee Yurub laga ciyaaro oo kale ayay dhalinyaradeena u tahay bisha ramdaan, annaguna waannu ku sii talo galnay iyada oo aanay ramadaan dhawayn oo waxaanu u dirnay xisbi ahaan koontaynar afartan mitir ah oo qalab isboorti ah waxaananu u qaybinay dalka oo dhan si ay dhalinyaradu tartannadooda u ciyaaraan, garoonkan cidlada ah ee uu ka dhex hadlayayna [Xuseen Axmed Caydiid] bisha ramadaan markii ay bilatay ayaanu qalabka u geynay. Dee meeshii oo cidla ah oo aanay cidi joogin ayuu intuu isa soo dhex taagay uu ka dhex tororgleeyay, xagguu ku maqnaa waqtigay u baahnaayeen dhalinyaradu,haba ahaatee hadduu tororog leynayo ma waxa uu garan waayay soddomeeyo dhalinyaro ah soo ururso oo isku sawir, intaana wuu garan waayay”. Ayuu yidhi guddoomiyaha golaha dhexe ee KULMIYE Garyaqaan Jaamac Ismaaciil Cige.
